Nandurbar Crime News : नवापाडा येथे छाप्यात दीड लाखाचा मद्यसाठा जप्त

Nandurbar Crime News : नंदुरबार स्थानिक गुन्हे शाखा पथकाने शनिवारी (ता. २८) अक्कलकुवा तालुक्यातील नवापाडा येथे छापा टाकून एक लाख ६१ हजारांचा विदेशी मद्यसाठा जप्त केला.

डोडवा येथील स्मशानभूमी परिसरात कुवरसिंग पाडवी (रा. नवापाडा, ता. अक्कलकुवा) याने विनापरवाना अवैध मद्यसाठा बाळगून ठेवल्याची माहिती मिळाल्यावर कारवाई करण्यात आली. (illegal honey seized in raid at Nuapada nandurabr crime news)

या प्रकरणी आरोपी फरारी असून, कारवाईत २४ खोके मुद्देमाल जप्त करण्यात आला. नंदुरबार स्थानिक गुन्हे शाखा पोलिस नाईक कुवरसिंग नाईक यांच्या फिर्यादीवरून अक्कलकुवा पोलिस ठाण्यात गुन्हा दाखल झाला. गुमानसिंग पाडवी तपास करीत आहेत.

नवापाडा (ता. अक्कलकुवा) येथे तीन महिन्यांतील ही दुसरी कारवाई आहे. अवैध धंदे करणाऱ्यांनी तस्करी करण्यासाठी नवापाडा येथे झुपे गोडाउन तयार केले असून, रात्रीच्या सुमारास गुजरातमध्ये तस्करी होत असते.

अवैध मद्यविक्री थांबेना

अक्कलकुवा तालुका गुजरातच्या सीमावर्ती भागात येतो. गुजरातमध्ये दारूबंदी असल्याने नावापाडा व तीनखुन्या या गावांत अवैधरीत्या मद्यसाठा करून रात्रीच्या काळोखात गुजरातमध्ये तस्करी केली जात आहे. वारंवार कारवाई करूनही अवैध मद्यसाठा आढळून येत असल्याने अशा अवैध विक्रेत्यांना कायद्याच्या धाक नसल्याचे दिसून येते.