जयंत पाटील- फडणवीसांचा एकत्र प्रवास; चर्चा तर होणारच

शहादा - दोन भिन्न पक्षात असणारे दिग्गज नेते एका कार्यक्रमानिमित्त शहाद्यात येऊन एकाच वाहनात प्रवास केला. या नेत्यांचा व्यासपीठावरील गप्पा व एकाच वाहनाचा प्रवास कार्यकर्त्यांसाठी चर्चेचा विषय ठरला. लोणखेडा (ता. शहादा) येथे सहकार महर्षी अण्णासाहेब पी. के. पाटील यांच्या पूर्णाकृती पुतळ्याच्या भूमिपूजनप्रसंगी राज्याचे विरोधी पक्षनेते देवेंद्र फडणवीस व सत्ताधारी पक्षाचे जलसंपदा मंत्री जयंत पाटील आले होते.

फडणवीस आणि जयंत पाटील यांनी यावेळी एकाच वाहनातून प्रवास केला. यामुळे शुक्रवारी (ता. १७) मुख्यमंत्री उद्धव ठाकरे यांनी औरंगाबाद येथे एका कार्यक्रमातील भाषणात टाकलेल्या गुगलीनंतर भाजप सेना पुन्हा एकत्र येणार का या चर्चेने राज्यातील राजकारण ढवळले आहे. मुख्यमंत्र्यांच्या भावी सहकारी वक्तव्यानंतर या दोघांनी एकत्र येणे, शिवाय एकत्रित प्रवास, व्यासपीठावरील गप्पा हा चर्चेचा विषय ठरला. कार्यकर्त्यांमध्ये विविध तर्कवितर्क लावले जात आहेत.

राज्याच्या सत्ताधारी पक्षाचे जलसंपदामंत्री जयंत पाटील व प्रमुख विरोधी पक्षाचे नेते तथा माजी मुख्यमंत्री देवेंद्र फडणवीस यांना एका वाहनात प्रवास केल्याचे पाहून तसेच कार्यक्रमस्थळी गप्पा केल्याचे पाहून अनेकांनी वेगवेगळ्या चर्चा केली. अर्थात एकाच क्षेत्रात काम करणाऱ्या दोन नेत्यांची कार्यक्रमात भेट झाल्यानंतर साहजिकच दोन्ही नेत्यांची चर्चा झाली. ही चर्चा स्थानिक पातळीवरील कार्यकर्त्यांमध्ये चर्चेचा विषय ठरली.