नंदूरबारमध्ये सकाळी बाजारपेठेत गर्दी अन्‌ दुपारनंतर शुकशुकाट 

नंदुरबार ः जिल्ह्यात गुरुवारपासून (ता. १) १५ दिवसाच्या लॉकडाउनच्या अंमलबजावणीस सुरूवात झाली आहे. मात्र भाजीपाला, फळे, दूध, रेस्‍टॉरंट, किराणा दुकानांना दुपारी एकपर्यंत सुरू ठेवण्याची मुभा दिल्याने सकाळपासून दुपारी एकपर्यंत बाजारपेठेत गर्दी, तर दुपारनंतर मात्र शुकशुकाट होता. पोलिसांकडून शहरात प्रवेश करणाऱ्या मुख्य रस्त्यांवर वाहनांची तपासणी केली जात होती. आज पहिला दिवस होता म्हणून लॉकडऊनच्या अंमलबजावणीची तीव्रता फारशी दिसून आली  नाही. 

आवर्जून वाचा- साक्रीत ऑक्सिजन बेडचा तुडवडा.. आणि धगधगत्या स्मशानभूमी

जिल्ह्यात दिवसंदिवसे कोरोना बाधितांची संख्या वाढत आहे. आतापर्यंत पंधरा हजारावर नागरिकांना बाधा झाली आहे. तर तीनशेवर नागरिकांचा मृत्यू झाला आहे. सध्या साधारण शासकीय नोंद नुसार सुमारे पाच हजा रुग्णांवर उपचार सुरू आहेत. जिल्हा रुग्णालयासह खासगी रूग्णालयेही फुल्ल झाले आहेत. एवढ्या बिकट स्थितीला आटोक्यात आणण्यासाठी जिल्हाधिकारी डॉ. राजेंद्र भारूड यांनी थेट मुख्यमंत्री उद्धव ठाकरे यांच्याशी संपर्क करीत लॉकडाउनची परवानगी मागितली होती, त्यानुसार १ ते १५ एप्रिल असे १५ दिवस लॉकडाउन करण्यात आला आहे. त्यात काही राजकीय पक्ष व संघटनांच्या मागणीनुसार भाजीपाला, फळे, दूध, रेस्‍टॉरंट, किराणा दुकानांना दुपारी एकपर्यंत सुरू ठेवण्याची मुभा दिली आहे.

आवश्य वाचा- ग्रामीण भागात कोरोना नियंत्रणासाठी ग्रामसमितीवर जबाबदारी  
 

चौका-चौकात पोलिस बंदोबस्त

आज पहिल्या दिवशी दुपारी एकपर्यंत बाजारपेठेत गर्दी होती. मात्र एकनंतर चौकाचौकांत केवळ पोलिस तैनात होते. सर्वत्र शुकशुकाट होता. शहरात येणाऱ्या मुख्य रस्त्यांवर बॅरिकेटस् लावण्यात आले आहे. तसेच वाहनांची तपासणी करून पुढे सोडले जात आहे. मास्क नसलेल्या वाहनधारकांवर कारवाई केली जात आहे. 
 

संपादन- भूषण श्रीखंडे