कोरोना योद्धा म्‍हणून अविरत सेवा; पण कोरोनाच्या लागणनंतर मृत्‍यूची झुंज अपुर्ण

शहादा (नंदुरबार) : येथील तालुका पंचायत समितीच्या आरोग्य विभागात कार्यरत असलेले कर्मचारी बापू पिरण पाटोळे यांनी कोरोनाच्या काळात कोरोना योद्धा म्‍हणून अविरत सेवा बजावली. अशात त्‍यांना कोरोनाची लागण झाली आणि महिनाभरापासून उपचार घेत असताना त्‍यांनी कोरोनाविरूद्धची मृत्यूशी सुरू असलेली झुंज अपुर्ण पडली.

शहादा पंचायत समितीच्या आरोग्य विभागात कार्यरत कर्मचारी बापू पिरण पाटोळे हे मार्च 2020 पासून कोरोना काळात अविरत सेवा बजावत होते. या काळात कुठल्याही प्रकारची रजा न घेता ते कार्यरत होते. परंतु 20 डिसेंबर 2020 ला त्यांना अचानक श्वसनाचा त्रास जाणवू लागला. त्यानंतर त्यांनी सातपुडा कोविड हॉस्पिटल शहादा येथे कोविड चाचणी केली असता ते पॉझिटिव्ह आढळून आले. 

त्रास अधिकच वाढला अन्‌
कोविडवर औषधोपचार सातपुडा येथे घेत असतांना तब्येत अधिकच खालावत होती. म्हणून त्यांना सातपुडा येथील डॉक्टरांच्या सल्ल्यानुसार पुढील उपचारासाठी नाशिक येथील खासगी मल्टीस्पेशालिटी कोविड हॉस्पिटलमध्ये उपचारासाठी दाखल करण्यात आले. 3 जानेवारी 2021 पासून तेथे औषधोपचार सुरू होते. उपचार घेत असतांना 29 जानेवारीला अचानक दीर्घ स्वरूपात श्वसनाचा त्रास जाणवू लागल्याने त्यांना व्हेंटिलेटरवर ठेवण्यात आले. मात्र त्‍यांची कोरोना विरूद्धची झुंज अपुर्ण पडली आणि 31 जानेवारीला कोविड प्रादुर्भावाने मृत्यूशी झुंज देताना त्यांची प्राणज्योत मालवली.

सेवापूर्तीला महिनाभराचा काळ
बापू पाटोळे यांनी आपल्‍या सेवेत अनेक विभागात काम बजाविले. आता आरोग्‍य विभागात काम करत असताना त्‍यांनी कोरोना योद्धा म्‍हणून आपली जबाबदारी चोखपणे सांभाळली. संपुर्ण नोकरीनंतर आता त्‍यांच्या सेवापूर्तीला केवळ एक महिना असतांनाच काळाने त्यांच्यावर झडप घातली. त्यांच्या पश्चात पत्नी, दोन मुले असा परिवार आहे. 

संपादन ः राजेश सोनवणे