आधारकार्ड सोबत नसेल तर होणार कारवाई

नंदुरबार : संचारबंदीच्या निर्बंधातील (Nandurbar lockdown) सोमवार ते शुक्रवार या पाच दिवसांत सकाळी ७ ते ११ या व्यतिरिक्त अत्यावश्यक सेवांसाठी वाहनाद्वारे कोणत्याही व्यक्तीस बाहेर जायचे असल्यास आधारकार्ड बाळगणे अनिवार्य राहील. आधारकार्ड (Aadhar card) नसल्यास संबंधित व्यक्ती कारवाईस पात्र ठरतील. हे नियम रुग्णवाहिकेमधील कर्मचारी व रुग्ण यांना लागू राहणार नाहीत, असे निर्देश जिल्हाधिकारी डॉ. राजेंद्र भारूड (Collector rajendra bharud) यांनी दिले आहेत. (nandurbar collector rajendra bhaurd aadhar card compulsory in emergency)

डॉक्टर, वैद्यकीय व निमवैद्यकीय कर्मचारी यांनीही त्यांचे आधारकार्ड सतत आपल्याजवळ ठेवावे. दुचाकी वाहन चालक तसेच सहप्रवासी यांनी हेल्मेट घालणे अनिवार्य असून वाहनाद्वारे रस्त्यावर जाताना चालक व सहप्रवासी यांनी हेल्मेट घालावे. यामुळे कोरोना विषाणूंच्या संसर्गापासून डोळे सुरक्षित करण्यास मदत होईल.

मास्‍क न वापरणाऱ्यांवर गुन्हा

घराबाहेर पडलेल्या, रस्‍त्‍यावरून चालणाऱ्या किंवा दुचाकी, तीन चाकी, चारचाकी आदी वाहने चालवत असणाऱ्या प्रत्येक व्यक्तीने आपले नाक व तोंडावर व्यवस्थितपणे झाकलेले मुखवटे घालावेत. हनुवटीच्या खाली मास्क घालणे किंवा नाक आणि तोंड दोन्ही उघडे करणेदेखील गुन्हा आहे. मुखवट्याचा शास्त्रीय पद्धतीने वापर न करणारे व्यक्ती व्हायरसचे सुपर फैलाव करणारे असतात. अशा व्यक्तींच्या विरोधात कायद्यात तरतूद केल्याप्रमाणे गुन्हा नोंदविला जाईल.

यंत्रणेवर दबाव टाकू नये

कोणतीही व्यक्ती, लोकप्रतिनिधी असेल किंवा कोणत्याही राजकीय पक्षांचे पदाधिकारी, जिल्हा परिषद, नगरपालिका, नगरपंचायत, ग्रामपंचायत आदीं सदस्यांना अशा निर्बंधातून मुभा नसेल. स्वतः ला किंवा कोणत्याही उल्लंघनकर्त्याला अशा निर्बंधांचे उल्लंघन केल्याबद्दल गुन्हा दाखल करण्यापासून वाचविण्यासाठी संबंधित अंमलबजावणी यंत्रणेवर कोणताही दबाव किंवा प्रभाव टाकू नये. अशा प्रकारचे कृत्य केल्यास संबंधित व्यक्ती किंवा लोकप्रतिनिधीवर लोकसेवकाद्वारे कर्तव्य बजावताना हस्तक्षेप केल्याबद्दल दंडनीय गुन्हा दाखल होईल, असे आदेशात नमूद केले आहे.