Dhule Crime News : तरुणीचा गळा चिरून खून

Dhule Crime News : येथील नकाणे रोड परिसरातील बालाजीनगरातील निकिता कल्याण पाटील (वय २२) या तरुणीचा चाकूने गळा चिरून निर्घृण खून झाल्याची घटना बुधवारी (ता. २२) सायंकाळनंतर उजेडात आली.(Murder of young woman in dhule crime news)

निकिता सायंकाळी सहाच्या सुमारास घरात एकटी असताना अज्ञात व्यक्तीने अज्ञात कारणावरून तिचा निर्घृण खून केला. नंतर चाकू घटनास्थळीच ठेवून संशयिताने पळ काढला.

ही घटना कळताच पोलिस उपअधीक्षक सचिन हिरे, एलसीबीचे पोलिस निरीक्षक दत्तात्रय शिंदे, देवपूर पोलिस ठाण्याचे निरीक्षक सतीश घोटेकर आणि पश्‍चिम देवपूर पोलिस ठाण्याचे पथक घटनास्थळी दाखल झाले.

निकिताचे घर एकांतात असून, तिची आई ठिकठिकाणी पोळ्या लाटण्याचे काम करते, तर वडील खासगी वाहनचालक आहेत. त्यांच्यासह तिचा भाऊ घरी नसताना अंगावर शहारे आणणारी ही घटना घडली.

पोलिसांनी धागेदोरे तपासत मारेकऱ्याच्या शोधासाठी पथके रवाना केली आहेत. या घटनेत पोलिसांना दोन जणांवर संशय आहे. घटनास्थळी रात्री उशिरापर्यंत गर्दी होती. निकिता शहरातील एका नामांकित महाविद्यालयाची विद्यार्थिनी आहे.