Nandurbar Accident News : पिक-अप नदीत पडून 2 ठार, तर 3 गंभीर

Nandurbar Accident News : अक्कलकुवा तालुक्यातील गमनचा उमरपाडा येथील देवनदीच्या खाडीत पिक-अप गाडी पडून दोन जण जागीच ठार झाले, तर तीन जण जखमी झाले आहेत. जखमींवर रुग्णालयात उपचार सुरू आहेत. मृतांमध्ये एकजण चोपडा तालुक्यातील, तर एक नाशिक येथील रहिवासी आहे. याबाबत चालकाविरुद्ध मोलगी पोलिसांत गुन्हा दाखल झाला. (Nandurbar Accident Pickup falls into river 2 killed 3 seriously)

नाशिक येथील कैलास सुरेश पाटील पिक-अप गाडी (एमएच १८, एए ४७३३)वर मजूर घेऊन अक्कलकुवा तालुक्यातील पिंपळखुटा येथे जात होता. या वेळी गाडीत मजूरही सोबत होते. पिंपळखुटा ते गमनचा उमरपाडा रस्त्यावर चालक कैलास पाटील याने गाडी भरधाव चालविल्याने त्याचे नियंत्रण सुटले.

देवनदीच्या खाडीत गाडी पडून राजू ओंकार बारेला (वय ३०, रा. कर्जाना, ता. चोपडा, जि. जळगाव) व पोपट दत्तू सोनवणे (४०, रा. नाशिक) या दोघांचा जागीच मृत्यू झाला. गाडीतील चालक कैलास पाटील (रा. नाशिक) याच्यासह ज्ञानेश्‍वर उत्तम वाघ (रा. कुंजर, ता. चाळीसगाव), सुनील बड्या पावरा (रा. खर्डी खुर्देचा पाटीलपाडा, ता. धडगाव) हे तिघे गंभीर जखमी झाले.

ही घटना नागरिकांनी मोलगी पोलिसांना कळविली. त्यानुसार पोलिसांनी घटनेचा पंचनामा केला. जखमींना तत्काळ उपचारासाठी अक्कलकुवा येथे पाठविले. त्यांच्यावर उपचार सुरू आहेत. याबाबत ज्ञानेश्‍वर उत्तम वाघ यांनी मोलगी पोलिसांत फिर्याद दिली. त्यानुसार चालक कैलास पाटील याच्याविरुद्ध गुन्हा दाखल झाला आहे. सहाय्यक पोलिस निरीक्षक प्रकाश वानखेडे तपास करीत आहेत.