Bogus Call Center Fraud : फसवणूक करणारी आंतरराज्य टोळी गजाआड!

नंदुरबार : बोगस कॉल सेंटर चालवून नागरिकांची फसवणूक करणाऱ्या आंतरराज्यीय टोळीचा पर्दाफाश येथील स्थानिक गुन्हे शाखेने केला आहे. त्यात तीन जणांना ताब्यात घेण्यात आले असून दोन लाख ४९ हजार रुपये किमतीचा मुद्देमाल हस्तगत करण्यात आला आहे. तिन्ही भामटे गुजरातमधील असून सध्या राजमोही (ता.अक्कलकुवा) येथून ते बोगस कॉल सेंटर चालवित होते. (Nandurbar Bogus Call Center Fraudulent interstate gang arrested nandurbar crime news)

जिल्हा पोलिस अधीक्षक पी. आर. पाटील यांना मिळालेल्या माहितीनुसार मोठी राजमोही (ता. अक्कलकुवा) गावात जावेद निजामोद्दीन मक्राणी यांच्या घरी सुरत येथून आलेले काही तरुण राहात असून ते इन्स्टाग्रामवर व्हीआयपी मोबाईल नंबर विक्रीची जाहिरात करून ग्राहकांची फसवणूक करीत असल्याचे लक्षात आले.

ग्राहकांना आमिष दाखवून त्यांचेकडून फोन पे, गुगल पे, पेटीएम किंवा इतर माध्यमातून पैसे घेऊन त्यांना कोणत्याही प्रकारचे व्हीआयपी मोबाईल नंबर न देता त्यांची फसवणूक करीत असल्याचे लक्षात येताच स्थानिक गुन्हे शाखेचे पोलिस निरीक्षक किरणकुमार खेडकर यांच्या मार्गदर्शनाखाली जाऊन बोलाविले. पथकाने यासीन रईस मक्राणी (१९ रा. सुरत), एजाज तमीजोद्दीन मक्राणी (२५, रा.मोठी राजमोही ता. अक्कलकुवा), यशराज विजयसिंह महिदा (२५ सुरत) यांना ताब्यात घेतले.

हेही वाचा : संयुक्त नावावरील गृहकर्जातून होईल प्राप्तीकराची बचत...

पाच विविध कंपनीचे महागडे मोबाईल, सीमकार्ड, डेबिट कार्ड आदी साहित्य जप्त करण्यात आले. त्यांनी तपासात ग्राहकांची आर्थिक फसवणूक करीत असल्याची कबुली दिली. गत सहा महिन्यात कर्नाटक, केरळ, आंध्रप्रदेश, पंजाब आदी राज्यांमधील नागरिकांची व्हीआयपी मोबाईल नंबर देण्याचे आमिष दाखवून फसवणूक केली असल्याचे त्यांनी सांगितले.

"नागरिकांनो, ऑनलाइन शॉपिंग साइटवरुन कोणत्याही आमिषाला बळी पडू नये, अनोळखी व्यक्तीच्या बँक अकाउंटमध्ये किंवा पेटीएमद्वारे खात्री केल्याशिवाय कोणताही आर्थिक व्यवहार करू नये. किंवा अशा प्रकारचे कॉल आल्यास किंवा फसवणूक झाल्यास तत्काळ पोलिसांशी संपर्क साधावा." - पी. आर. पाटील, पोलिस अधीक्षक, नंदुरबार