Nandurbar Bribe Crime : कृषी अधिकाऱ्यास लाच घेताना पकडले

Nandurbar Bribe Crime : मंजूर शेततळे अनुदानाची रक्कम मिळवून देण्यासाठी वीस हजाराची लाच घेतांना नवापूर मंडळ कृषी अधिकारी सागर अहिरे यास रंगेहाथ पकडले. नंदुरबार लाचलुचपत प्रतिबंधक विभागाच्या पथकाने ही कारवाई केली. या बाबत नवापूर पोलीस ठाण्यात गुन्हा दाखल करण्यात आला आहे. थुवा ( ता. नवापूर ) येथे तक्रारदार यांच्या पत्नीच्या नावे असलेल्या शेतात मुख्यमंत्री शाश्वत कृषी सिंचन योजनेअंतर्गत वैयक्तिक शेततळे बांधण्याची मंजुरी मिळाली होती. (Agriculture officer caught taking bribe )

सदर शेततळ्याच्या अनुदानाची रक्कम मिळवून देण्यासाठी नवापूर मंडळ कृषी अधिकारी सागर अशोक अहिरे (वय ३३) यांनी पंच साक्षीदारासमक्ष तक्रारदार यांच्याकडून २० फेब्रुवारी २०२४ रोजी २५ हजाराच्या लाचेची मागणी करून तडजोडीअंती वीस हजार देण्याचे कबूल केले. सागर अहिरे यांनी पंचांसमक्ष वीस हजार लाचेची रक्कम घेतली. म्हणून सागर अहिरे यांचे विरुद्ध नवापूर पोलीस स्टेशन येथे गुन्हा दाखल करण्यात आला आहे.

सदर कारवाई नंदुरबार लाचलुचपत प्रतिबंधक विभाग सापळा अधिकारी पोलीस निरीक्षक समाधान वाघ, पर्यवेक्षण अधिकारी पोलीस उपअधीक्षक राकेश चौधरी, पडताळणी कार्यवाही पथक पोलीस हवालदार विजय ठाकरे, विलास पाटील, देवराम गावित, पोलीस नाईक हेमंतकुमार महाले, सुभाष पावरा या पथकाने केली.