Nandurbar Soybean Crop Crisis: सोयाबीनवर ‘येलो मोझक’चा प्रादुर्भाव! 1 हजार 875 हेक्टरचे नुकसान; शेतकऱ्यांची चिंता वाढली

तळोदा : सोयाबीन पिकावर ‘येलो मोझक’ पसरल्याने तालुक्यातील तब्बल एक हजार ८७५ हेक्टर क्षेत्रावर सोयाबीनची पेरणी केलेल्या उत्पादक शेतकऱ्यांची चिंता वाढली आहे. समाधानकारक पावसाने पिकाची वाढ चांगली झालेली असताना सोयाबीनच्या शेंगा मात्र जेमतेमच लागल्याचे शेतकऱ्यांचे म्हणणे आहे. त्यामुळे सोयाबीनचे उत्पादन घटण्याची भीती आहे. (Infestation of Yellow Mozak on soybeans)

तळोदा तालुक्यात खरिपात कापूस, सोयाबीन, तांदूळ, तूर, मूग, ज्वारी, उडीद पिकांची लागवड केली जाते. त्यात सर्वाधिक लागवड कापसाची केली जाते. त्याखालोखाल सोयाबीनला पसंती दिली जाते. त्यामुळे यंदा एक हजार ८७५ हेक्टरहून अधिक क्षेत्रावर सोयाबीनची पेरणी शेतकऱ्यांनी केली. यंदा जूनपासून जोरदार पाऊस झाल्याने पिकांची वाढही चांगली झाली.

मात्र, चांगली वाढ झालेल्या सोयाबीन पिकावर ‘येलो मोझक’ पसरल्याने शेतकऱ्यांची चिंता वाढली आहे. ‘येलो मोझक’मुळे सोयाबीनचे पीक पिवळे पडले आहे. ‘येलो मोझक’मुळे सर्वत्र पेरणी केलेले सोयाबीन पीक पिवळे पडू लागले आहे. त्यामुळे सोयाबीन उत्पादक शेतकरी संकटात सापडले आहेत. (latest marathi news)

तालुक्यात तळोदा, काजीपूर, चिनोदा, मोड, आमलाड, दलेलपूर, तलावडी, रोझवा शिवारात सोयाबीनचे उत्पादन मोठ्या प्रमाणात घेतले जाते. मात्र ‘येलो मोझक’मुळे पिके पिवळी पडल्याने शेतकऱ्यांनी चिंता वाढली आहे.

"यंदा सहा एकरहून अधिक क्षेत्रावर सोयाबीनची लागवड केली आहे. मात्र सर्व पीक पिवळे पडले आहे. त्यात सोयाबीन शेंगा जेमतेमच लागल्या आहेत. त्यामुळे उत्पादन घटणार असल्याने खर्चही निघणार नाही, अशी परिस्थिती आहे."- सुधाकर पिंपरे, शेतकरी, तळोदा

"सोयाबीन पिकावर यंदा ‘येलो मोझक’चा प्रादुर्भाव दिसत आहे. त्यामुळे सर्व पीक पिवळे पडले असून, शेतकऱ्यांची चिंता वाढली आहे."- दीपक सूर्यवंशी, कृषितज्ज्ञ, तळोदा