Nandurbar Crime News : सुलवाडे येथे 90 हजारांचे सागवानी लाकूड जप्त; वन विभागाकडून एकाविरोधात गुन्हा दाखल

Nandurbar Crime News : सुलवाडे (ता. शहादा) येथे एका राहत्या घरात तयार केलेले सागवानी फर्निचर व सागवानी लाकूड वन विभागाच्या राणीपूर वनक्षेत्र अधिकारी व कर्मचाऱ्यांनी टाकलेल्या छाप्यात जप्त करण्यात आले. या संदर्भात वन कायद्यानुसार बेकायदेशीररीत्या तयार करण्यात आलेले सुमारे ९० हजारांचे सागवानी फर्निचर व सागवानी लाकूड वृक्षांची कत्तल करून विक्री करण्याच्या उद्देशाने ठेवल्याप्रकरणी एकाविरोधात गुन्हा दाखल करण्यात आला. ( saag wood worth 90 thousand seized in Sulwade by forest department )

सुलवाडे येथे एका व्यक्तीकडे सागवानी झाडांची कत्तल करून फर्निचर तयार करून काही लाकूड दडवून ठेवल्याची गुप्त माहिती सहाय्यक वनसंरक्षक संजयराज साळुंखे यांना मिळाली. त्यांनी तत्काळ तोरणमाळचे वनक्षेत्रपाल महेश चव्हाण यांना या माहितीची चौकशी करून त्या व्यक्तीच्या घरात झाडाझडती करून तपासणी करण्याचे आदेश दिले. या तपासणीत सुलवाडेतील सुरेश मिस्तरी यांच्या राहत्या घरी राणीपूर वनक्षेत्रपाल महेश चव्हाण व त्यांच्या पथकाने सर्च वॉरंट जारी करून तपासणी केली.

त्यात सुरेश मिस्तरी यांच्या घरात अवैधरीत्या व विनापरवाना वाहतूक करून सागवानी लाकडापासून तयार केलेले सोफा सेट, खुर्ची तसेच तीन नग महाराजा पलंग व इतर तयार साइज असलेला सागवानी लाकडाचा मुद्देमाल मिळून आला. वन विभागाकडून सागवानी अवैध मालाचे मोजमाप केले असता एकूण नग संख्या ७४ व आकारमान घनमीटर ०.७९२ एवढे भरले असून, बाजारभावाप्रमाणे ९० हजार रुपये असून, विनापरवाना अवैध मुद्देमाल जप्त करण्यात आला.

याबाबत सुरेश मिस्तरी यांच्याविरोधात राणीपूर वनपाल यांनी वन गुन्हा नोंदविला असून, ही कारवाई सहाय्यक वनसंरक्षक संजयराज साळुंके यांच्या मार्गदर्शनात तोरणमाळ वनक्षेत्रपाल महेश बी. चव्हाण, शहादा वनक्षेत्रपाल आशुतोष मेढे, तोरणमाळ वनपाल एस. एच. पवार, दरा वनपाल रूपाली मोरे, वनपाल मंदाणा प्रियंका बिरारे, वनरक्षक अनिल तावडे, वनरक्षक शहादा नितीन पाटील, गुलाब तडवी, वाहनचालक नईम मिर्झा, ज्ञानेश्वर पवार यांच्या पथकाने केली.