Nandurbar: कागदपत्रांची जुळवाजुळव करताना महिला श्‍वास गुदमरून कोसळली! ‘लाडकी बहिण’च्या लाभासाठी सेतू केंद्रांवर सर्वत्र गर्दी

शहादा : राज्यात शासनाने सुरु केलेल्या मुख्यमंत्री माझी लाडकी बहीण योजनेचा लाभ मिळण्यासाठी कागदपत्रांची जमवाजमव करण्यासाठी महिलांची सेतू केंद्र तसेच शासकीय कार्यालयांपुढे गर्दी होत आहे. सोमवारी (ता.१) शहरातील सेतू केंद्रात कागदपत्रांची पूर्तता करण्यासाठी आलेली एक महिला गर्दीत श्‍वास गुदमरल्याने चक्कर येऊन पडल्याने एकच गोंधळ उडाला. प्रसंगावधान राखून नागरिकांनी संबंधित महिलेला तत्काळ रुग्णालयात दाखल केले. (Nandurbar Woman fainted while matching documents Ladki Bahin scheme)

याबाबत सविस्तर वृत्त असे की, मुख्यमंत्री माझी लाडकी बहीण योजने अंतर्गत कागदपत्र जुळवण्यासाठी शहरातील शासकीय कार्यालय व सेतू केंद्र येथे मोठ्या प्रमाणावर लाभार्थी महिलांच्या रांगा पाहावयास मिळत आहे.

त्यातच शहरातील जुन्या तहसील कार्यालयात असलेल्या सेतू केंद्रात कागदपत्रांची जुळवा जुळव करण्यासाठी आलेल्या सीता योगेश ठाकरे (रा.टेक भिलाटी, शहादा) या महिलेला गर्दीत श्वास गुदमरल्याने चक्कर आल्याने ती रस्त्यावर पडली. त्यामुळे एकच गोंधळ उडाला. तेथे उपस्थित नागरिकांनी तत्काळ महिलेला रिक्षातून उपचारासाठी रुग्णालयात दाखल केले. (latest marathi news)

अटी-शर्थीमुळे कार्यालयात गर्दी....

मुख्यमंत्री माझी लाडकी बहीण ही योजना २१ ते ६० वर्षे वयोगटातील विवाहित, परितक्त्या, विधवा महिलांसाठी आहे. त्यासाठी महाराष्ट्रातील रहिवासी असल्याचे अधिवास प्रमाणपत्र, उत्पन्नाचा दाखला, बँक खाते, रेशन कार्ड मध्ये महिलेचे नाव अंतर्भूत असावे, अशी अट असल्यामुळे सोमवार (ता.१) पासून शहादा येथील शासकीय कार्यालय व सेतू केंद्रात महिलांची व कुटुंबीयांची मोठ्या प्रमाणात गर्दी पहावयास मिळाली.

या योजनेत लवकर सहभागी होऊन आपणास लवकर मानधन मिळावे आणि यासाठी दिलेला पंधरा दिवसांचा अवधी म्हणजेच एक ते १५ जुलै २०२४ पर्यंत नाव नोंदणी करावयाचे असल्याने शहरामध्ये प्रचंड गर्दी दिसून आली. यावेळी शासनाकडून कागदपत्र जमवण्यासाठी जास्तीत-जास्त अवधी द्यावा अशी नागरिकांनी मागणी केली आहे.