नाशिक शहरात तीन घरफोड्या; पावणेपाच लाखांचा मुद्देमाल चोरी

नाशिक : शहरात गेल्या दोन दिवसात चोरट्यांनी तीन घरफोड्या करीत तब्बल पावणेपाच लाख रुपयांचा ऐवज चोरून नेला. पहिल्या घटनेत इंदिरानगर परिसरातील कमोद शॉपिंग कॉम्प्लेक्स येथील गजेंद्र सेल्स कॉर्पोरेशन नावाचे प्लंबिंग व हार्डवेअरचे संचालक समकित सुरेश राका (रा. गोकुळधाम अपार्टमेंट, गोविंदनगर) यांचे दुकान बुधवारी (ता. ७) मध्यरात्री फोडून २ लाख ४३ हजार रुपयांचे साहित्य चोरून नेले. याप्रकरणी इंदिरानगर पोलिसात घरफोडीचा गुन्हा दाखल करण्यात झाला असून, पुढील तपास महिला उपनिरीक्षक बारेला या करीत आहेत.

दुसऱ्या घटनेत वडाळा नाका परिसरातील बंद घराचा कडीकोयंडा तोडून चोरट्याने पावणेदोन लाखांची रोकड व दागिने असा १ लाख ९१ हजारांचा ऐवज चोरून नेल्याचा प्रकार घडला. आशा राम आाल्हाटे (रा.नागसेन नगर, वडाळा नाका) यांनी फिर्याद दिली आहे. याप्रकरणी मुंबई नाका पोलिसात गुन्हा दाखल झाला असून, सहायक निरीक्षक गेंगजे हे तपास करीत आहेत. तर, सिडकोतील हेडगेवार नगरमध्ये अज्ञात चोरट्याने बंद घराचा कडीकोयंडा तोडून ४३ हजार रुपयांचा ऐवज चोरून नेला. रोहीत अशोक भामरे (रा. हेगडेवारनगर, सिडको) यांनी दिलेल्या फिर्यादीनुसार अंबड पोलिसात घरफोडीचा गुन्हा दाखल करण्यात आला आहे.