Nashik Crime News : एक लाख 15 हजार किंमतीचे 7 चोरीचे मोबाईल हस्तगत; मुद्देमालासह ताब्यात

सिन्नर : चोरीचे मोबाईल नागरिकांना विकणाऱ्या एका इसमास सिन्नर पोलिसांनी सापळा रचून ताब्यात घेत त्याच्याकडून १ लाख १५ हजार रुपये किंमतीचे ७ मोबाईल हस्तगत केले असल्याची माहिती पोलिस निरीक्षक चंद्रशेखर यादव यांनी दिली.

याबाबत सविस्तर माहिती अशी,'सिन्नर शहरातील शिवाजीनगर परिसरात अजिंक्यतारा येथे एक इसम मोबाईल विक्री करण्यासाठी येणार असल्याची माहिती गुप्त बातमीदाराकडून सिन्नर पोलिसांना मिळाली होती. (7 stolen mobile phones worth 1 lakh 15 thousand seized nashik crime news)

याबाबत चौकशीच्या सुचनेनंतर अंमलदार संबंधित ठिकाणी गेले. त्या ठिकाणी एक इसम हातात दोन-तीन मोबाईल घेऊन उभा असल्याचे त्यांना दिसले. त्यास हटकले असता तो पळून जाऊ लागला. पाठलाग करून पोलिसांनी पकडून त्याचे नाव विचारले असता त्याने विशाल भानुदास रनखांब (वय-१९) रा.झापवाडी सिन्नर ता.सिन्नर जि.नाशिक असे सांगीतले.

त्याची अंगझडती घेतली असता त्याच्याकडे २ मोबाईल सापडले आणि नंतर तपासात ५ मोबाईल हस्तगत करण्यात आले. यामध्ये १५ हजार किमतीचा XIAOMI, १५ हजार किंमतीचा एक रेडमी, ४० हजार किमतीचा APPLE कंपणीचा I-Phone बंद, १४ हजार किमतीचा ओप्पो, ९ हजार किमतीचा VIVO, १० हजार किमतीचा सॅमसंग, १२ हजार किमतीचा OPPO असे एकूण १ लाख १५ हजार किंमतीच्या मोबाईलचा समावेश आहे.

या मोबाईलबाबत त्याला विचारले असता त्याने उडवाउडवीची उत्तरे दिली. या चोरीत आणखी कोणी साथीदार आहे का? अशी अधिकची चौकशी केली असता त्याने अनिकेत शेळके (रा.उदयोग भवन सिन्नर ता.सिन्नर) असे नाव सांगीतले.

हे सर्व मोबाईल जप्त करून त्याच्याविरुद्ध मुंबई पोलिस कायदा कलम १२४ प्रमाणे गुन्हा दाखल करण्यात आला आहे. तसेच फरार आरोपीचा पोलिस हवालदार एस. एस. गोसावी हे तपास करत आहेत.

ही कारवाई पोलिस अधीक्षक शहाजी उमाप अपर पोलिसअधीक्षक आदित्य मिरखेलकर उपविभागीय पोलिस अधिकारी निलेश पालवे यांच्या मार्गदर्शनाखाली पोलिस निरीक्षक चंद्रशेखर यादव पोलिस जवान समाधान बोराडे हेमंत तांबडे कृष्णा कोकाटे आप्पासाहेब काकड यांनी केली आहे.