जुने नाशिक : पोलिसांनी तळीरामांविरुद्ध कारवाईची हत्यार उपसले आहे. मंगळवारी (ता. २८) रात्रीच्या सुमारास विविध भागात मद्याच्या पार्ट्या करत परिसरात अशांतता पसरविणाऱ्या मद्यपींची पोलिसांकडून धरपकड करण्यात आली.
त्यामुळे पोलिस ठाण्यास मधुशालेचे स्वरूप आले होते. (action of police against drunkards Nashik Crime)
म्हसरूळ येथे माजी सैनिकाचा खून झाल्याची घटना सोमवारी (ता. २७) घडली. खून करणारे संशयित मद्य सेवन केलेले होते. त्यातून त्यांनी वाद घालत खून केल्याचे स्पष्ट झाले.
इतरही वेळेस मद्यपींकडून चौकात रस्त्यात मोकळ्या मैदानात कुठल्याही भागात मद्याचे सेवन करून धिंगाणा घातला जातो. परिसरात दहशत पसरवून नागरिकांना मारहाण करण्याचे प्रकार करत असतात.
म्हसरूळ येथील खून त्यातीलच एक घटना आहे. अशा मद्यपींवर वचक निर्माण करण्याचा प्रयत्न पोलिस विभागाकडून करण्यात आला आहे. पोलिस आयुक्त संदीप कर्णिक यांनी सर्व पोलिस ठाण्याच्या वरिष्ठ पोलिस निरीक्षकांची तातडीची बैठक घेऊन मद्यपींवर कारवाई करण्याच्या सूचना दिल्या.
मंगळवारी रात्री लगेचच पोलिसांनी कारवाई करण्यास सुरवात केली. वरिष्ठ पोलिस निरीक्षक गजेंद्र पाटील यांच्या मार्गदर्शनात भद्रकाली पोलिसांकडून पोलिस ठाणे हद्दीत ठिकठिकाणी गस्त करून मद्यपींना ताब्यात घेतले.
बराच वेळ त्यांना पोलिस ठाण्यात बसवून त्यांच्याविरुद्ध प्रतिबंधात्मक कारवाई करण्यात आली. शिवाय अशा प्रकारचे वर्तन यापुढे होता कामा नये, या संदर्भात समज देण्यात आली.
मद्यपींची संख्या अधिक असल्याने भद्रकाली पोलिस ठाणे आवारास मधुशालेचे स्वरूप आले होते. मद्यपी यांच्या कुटुंबीयांनीही पोलिस ठाणे आवारात गर्दी केली होती.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.