अखेर वृद्ध माता-पित्यांना सांभाळण्याचे मुलांकडून अभिवचन

सकाळ वृत्तसेवा

सिडको : आयुष्याच्या सायंकाळी ‘आता विसाव्याचे क्षण, माझे सोनियाचे मनी’ असे गुणगुणत, हाताच्या फोडाप्रमाणे वाढवलेल्या पोटच्या मुलांच्या प्रेमासाठी आसुसलेल्या वृद्ध-माता-पित्यांना अखेर त्या ‘लेकरांनी’ आपल्या घरट्यात सामावून घेतले आहे. त्यांची ही उदात्त वृत्ती व ‘सकाळ’च्या समाजाभिमुख वार्तांकनाबद्दल समाज बांधव, कुटुंबीय व ग्रामस्थांकडून कौतुक व अभिनंदनाचा वर्षाव होत आहे.

नांदगाव रोडवरील तळेगाव (ता. चाळीसगाव, जि. जळगाव) या छोट्याशा खेडेगावात हे वृद्ध दाम्पत्य एकाकी जीवन जगत होते. वृद्ध वडिलांचे वय ९४ तर, आईचे ९० वर्षे आहे. चार मुलं, दोन मुली, सुना, जावई व नातवंडे असा भला मोठा गोतावळा असून, एक मुलगा कंडक्टर, दुसरा मुख्याध्यापक, तिसरा शिक्षक व चौथा मुलगा संगीतकार आहे. एक मुलगी नाशिकला, तर दुसरी धुळे येथे राहते. त्यांच्यापैकी कुणीही आई-वडिलांसोबत राहात नसल्याने त्यांचे जीवन खडतर झाले होते. अशात, आपल्या भावांनी वृद्ध माता-पित्यांचा सांभाळ कारावा, यासाठी मुलगी मनीषा हिने दोन वर्षापासून खूप प्रयत्न केले. अखेर याबाबतचे वृत्त ‘सकाळ’ने काही दिवसांपूर्वी प्रसिद्ध करताच, मुलांनी तातडीने गावी धाव घेत आई-वडिलांची भेट घेतली. तसेच, बहिणीची भेट घेऊन, आम्ही आई-वडिलांचा सांभाळ करू, असे आश्‍वासन देतानाच झाल्या प्रकाराबद्दल दिलगिरीही व्यक्त केली. मुलांच्या या निर्णयाबद्दल सर्वांनीच समाधान व्यक्त केले असून, त्यांच्या निर्णयाचे स्वागत केले आहे. तसेच, ‘सकाळ’ने दिलेल्या वृत्ताबद्दल विविध स्तरांतून अभिनंदनाचा वर्षाव होत आहे.