Ashadhi Wari 2023 : संत निवृत्तिनाथांच्या पादुकांवर पावसाचा जलाभिषेक; भाविकांचा उत्साह द्विगुणित!

Ashadhi Wari 2023 : संतश्रेष्ठ निवृत्तिनाथांच्या पालखीसह दिंडी सोहळा पंढरपूर वारी पायी मार्गात असताना शनिवारी (ता. २४) सोलापूर जिल्ह्यातील दगडी अकोला येथे असताना रिमझिम पावसाच्या सरींचा जलाभिषेक संत निवृत्तिनाथांच्या पादुकांवर झाला.

उष्णतेने त्रस्त झालेल्या वारकऱ्यांना पावसाच्या शिडकाव्याने पायी वाटचालीत अधिक उत्साह आला. (ashadhi wari 2023 sant nivruttinath palkhi rain showers on nivruttinath maharaj paduka nashik news)

वारकऱ्यांना पावसाच्या रिमझिम सरीतच रेनकोटचे वाटप करण्यात आले. निवृत्तिनाथ संस्थानचे पदाधिकारी ॲड. नीलेश गाढवे पाटील, नारायण मुठाळ, सोमनाथ घोटेकर, अमर ठोंबरे, कांचन जगताप या विश्वस्तांच्या उपस्थितीत प्राथमिक स्वरूपात वारकऱ्यांना रेनकोटचे वाटप झाले.

वेणेगाव (ता. माढा) येथून वरुणराजाने संत निवृत्तिनाथांच्या पादुकांवर जलाभिषेक केला. पावसाच्या रिमझिम सरी अंगावर घेत वारकरी ज्ञानोबा, माउली, तुकाराम, निवृत्तीराया असा नामघोष करत आनंदून गेले.

हेही वाचा : Credit Card फसवणूक....काय घ्याल काळजी?

वरुणराजाच्या साक्षीने पालखी हळूहळू वेणेगाव येथून दगडी अकोल्याकडे मार्गस्थ झाली. या वेळी दगडी अकोला येथे ग्रामस्थांनी संत निवृत्तिनाथांच्या पालखीचे मनोभावे स्वागत करून आतषबाजीत तसेच टाळ-मृदंगाच्या गजरात भरपावसात स्वागत केले.

वेणेगाव येथे काही काळ पालखी विसावल्यानंतर वारकऱ्यांना पावसाच्या रिमझिम सरीतच प्रातिनिधिक स्वरूपात रेनकोटचे वाटप करण्यात आले. निवृत्तिनाथ संस्थानचे अध्यक्ष नीलेश गाढवे पाटील, पालखीप्रमुख नारायण मुठाळ, सचिव सोमनाथ घोटेकर, प्रसिद्धीप्रमुख अमर ठोंबरे, विश्वस्त कांचन जगताप आदी उपस्थित होते.