Nashik : बॅरिकेटस ठरताय चालकांसाठी डोकेदुखी

मखमलाबाद (जि. नाशिक) : नाकाबंदी, वाहन तपासणीसाठी शहरातील रस्त्यांवर बॅरिकेटस (Barricades) टाकून वाहनांची तपासणी केली जाते. भरधाव वाहनांवर नियंत्रण ठेवण्यासाठीदेखील विविध ठिकाणी बॅरिकेटस टाकल्या जातात. मात्र, पेठ रोडवर या बॅरिकेटमुळे आठवडाभरात तीन अपघात (Accident) झाल्याने असे बॅरिकेटस सुविधेएवजी वाहनचालकांसाठी दुविधाजनक ठरत आहेत. यामुळे पोलिसांची तपासणी सुरू नसताना बॅरिकेटस रस्त्याच्या कडेला ठेवत अपघात टाळावेत, अशी मागणी परिसरातील रहिवासी व वाहनचालकांकडून होते आहे.

गुजरातला जाणाऱ्या वाहनांची पेठ रोडवर नेहमीच वर्दळ असते. रात्री मालवाहू वाहनेही भरधाव वेगाने जात असतात. मात्र, येथे रस्त्याच्या मध्यभागी असलेल्या बॅरिकेटसमधून मार्ग काढताना वाहनचालकांचे नियंत्रण सुटून वाहन अपघात होण्याचे प्रमाण वाढले आहे. रस्त्यावर लाइटही नसल्याने अंधारात येथे अपघात होत आहेत. पोलिसांनी केलेले बॅरिकेटस कारवाई नसतांनाही येथे रस्त्यावर तसेच पडून राहतात. बॅरिकेटला कुठलेही रिफ्लेक्टर नसल्याने भरधाव जाणाऱ्या वाहनाच्या चालकांना अंदाज येत नसल्याने अपघात होत आहेत. यामुळे बॅरिकेटस वाहनचालकांसाठी दुविधाजनक ठरत आहेत. यामुळे रस्त्यावरील बॅरिकेटस काढावे व स्ट्रीट लाइट सुरू करावे, अशी मागणी विजय पिंगळे, योगेश पिंगळे, पंकज पिंगळे, सुमीत थेटे, विक्रम पिंगळे, धीरज शिंदे, किरण पिंगळे, किशोर रसाळ व जय हनुमान कला व क्रीडा सांस्कृतिक विकास मंडळाने केली आहे.