भुसावळ-नाशिक पुणे रेल्वे 'या' तारखेपासून सुरू होणार

नाशिक रोड : पुण्याला जाण्यासाठी परवडणारी आणि सोयीची असणारी भुसावळ- नाशिक- पुणे एक्स्प्रेस रेल्वेगाडी १० जुलैपासून पुन्हा सुरू होत असल्याची माहिती मध्य रेल्वेच्या भुसावळ विभागाने दिली आहे. कोरोनामुळे ही गाडी २२ मार्च २०२० पासून बंद करण्यात आली होती. आता दोन वर्षांच्या खंडांनंतर ती सुरू होत आहे. त्यामुळे प्रवाशांना आनंद झाला आहे.

या गाडीचा फायदा उत्तर महाराष्ट्रातील नाशिक, जळगाव आणि पुणे जिल्ह्यांतील प्रवाशांना होणार आहे. प्रवाशांच्या मागणीनंतर पंचवटीसारख्या इंटरसिटी ट्रेनला रिझर्व्हेशनऐवजी जनरल करण्यात आले आहे. आणखी काही गाड्या जनरल करण्यास सुरवात झाली आहे. इगतपुरी-भुसावळ ही पॅसेंजर गाडी मेमू ट्रेनच्या स्वरूपात काही दिवसांपूर्वी सुरू करण्यात आली आहे.

पुण्याला जाताना ही गाडी पहाटे नाशिकला येते. तेथून सुमारे सहा तासांनी पुण्याला पोचते. ही गाडी सध्या बंद असल्यामुळे नाशिककरांना बस आणि खासगी वाहनाने पुणे गाठावे लागत आहे. नाशिक-पुणे रेल्वेगाडी स्वस्त आहे. तिच्यापेक्षा रस्तामार्गे किमान तिप्पट भाडे लागते. स्पेशल चारचाकी गाडी केली तर हा खर्च अनेक पटींनी वाढतो. काही जण पंचवटी, राज्यराणीसारख्या गाडीने कल्याणला उतरून तेथून पुण्याला जाणारी रेल्वेगाडी पकडतात. परंतु, त्यात जास्त वेळ लागतो. अनेकदा जागा मिळत नाही. आता हक्काची नाशिक-पुणे गाडी सुरू होत असल्याने हा सर्व ताणतणाव वाचून प्रवाशांची पैसा व वेळेची बचत होणार आहे. गाडीत झोप मिळाल्याने प्रवासही आरामदायी होणार आहे. नाशिकचे अनेक विद्यार्थी उच्च शिक्षणासाठी पुण्यात राहतात. अनेक युवक पुण्यात नोकरी करतात, त्या सर्वांसाठी ही सोयीची होणार आहे.