Nashik News: लग्नातील फटाक्यांच्या आवाजाने पक्षी बेशुद्ध : सुदाम डेमसे

इंदिरानगर : पाथर्डी फाटा येथे हॉटेल एक्स्प्रेस इनमध्ये एका विवाह समारंभादरम्यान दुपारी बाराच्या सुमारास फटाक्यांच्या आतषबाजीमुळे परिसरातील इमारतींना अक्षरशः हादरे बसून आवाजाने उडणारे पक्षी देखील बेशुद्ध होऊन खाली पडल्याने संबंधितांविरुद्ध कायदेशीर कारवाई करण्याची मागणी माजी नगरसेवक सुदाम डेमसे यांनी केली आहे. (Birds fainted at sound of wedding firecrackers at express inn hotel Sudam Demse Nashik News)

रविवारी (ता. ३१) दुपारी बाराच्या सुमारास प्रचंड मोठा आवाज आणि सोबत धुराचे लोळमुळे केवळ हॉटेल परिसरच नाही तर प्रशांतनगर, मुरलीधरनगर, वासननगर, समर्थनगर भागातील नागरिक देखील आश्चर्यचकित झाले.

एका मोठ्या लग्नाच्या निमित्ताने ही फटाक्यांची आतषबाजी होत आहे, हे समजल्यानंतर नागरिक हैराण झाले. अनेकांनी घरांना हादरे बसल्याचे, तर एक्स्प्रेसच्या बाजूला असलेल्या डेमसे मळा भागात रॅकवरील भांडी देखील पडल्याच्या तक्रारी नागरिकांनी माजी नगरसेवक सुदाम डेमसे यांच्याकडे केली.

त्यांनी हॉटेल प्रशासनाला याबाबत विचारणा केली असता, आम्ही परवानगी घेतली आहे, असे उत्तर त्यांना देण्यात आले. या आवाजामुळे प्रशांतनगर येथे उडणारे काही पक्षी बेशुद्ध होऊन खाली कोसळले.

पक्ष्यांना नागरिकांनी प्रथमोपचार करत सोडले. रहिवासी भागात फटाक्यांच्या आवाज किती डेसिबलपर्यंत असावेत याची नियमावली आहे. मात्र आज झालेल्या फटाक्यांच्या आवाजामुळे हे सर्व नियम गुंडाळून ठेवले आहेत की काय, अशा संतप्त प्रतिक्रिया परिसरातील नागरिकांनी नोंदविल्या आहेत.

"एक्स्प्रेस इन हॉटेलमधील हा विवाह मोठ्या राजकीय परिवाराच्या घरातील होता, असे समजते. हॉटेल प्रशासनाने आवाजाबाबत उर्मटपणे उत्तर दिले. त्यामुळे इंदिरानगरचे वरिष्ठ निरीक्षक नितीन पगार यांना याबाबत माहिती दिली. आवाजाच्या मर्यादांची नियमावली आहे. पक्षी,ज्येष्ठ नागरिक आणि बालकांना या कानठळ्या बसविणाऱ्या फटाक्यांच्या आवाजाचा मोठा त्रास झाला आहे. संबंधितांवर कायदेशीर कारवाई केली पाहिजे."- सुदाम डेमसे, माजी नगरसेवक