नाशिक : बकरी ईदनिमित्त बोकड बाजार गजबजला

जुने नाशिक : बकरी ईदनिमित्त (Bakari Eid) बोकडांना मागणी वाढली आहे. फाळके रोड येथे बोकड बाजार सजला असून, सायंकाळी बोकड खरेदीसाठी मुस्लिम बांधवांची गर्दी होत आहे. रविवारी (ता. १०) मुस्लिम बांधवांकडून बकरी ईद साजरी केली जाणार आहे. ईद त्यागाचे प्रतीक असल्याने बकरी निमित्ताने कुर्बानी करण्याची प्रथा आहे. (Bokad Bazaar is full on occasion of Bakari Eid Nashik)

ईदच्या दिवसासह पुढील दोन दिवस असे तीन दिवस कुर्बानीचा धार्मिक विधी होतो. बोकडांची कुर्बानी होत असल्याने जुने नाशिक फाळके रोड येथे बोकडांचा बाजार थाटला असून, शहरासह ग्रामीण भागातून बोकड विक्रीसाठी आले आहे. दोन वर्षे कोरोना प्रादुर्भावामुळे साध्या पद्धतीने ईद साजरी करण्यात आली. शिवाय प्रशासनाकडूनदेखील बोकड बाजारास परवानगी नाकारली होती. यंदा परिस्थिती सामान्य असल्याने पुन्हा दरवर्षीप्रमाणे या ठिकाणी बाजार गजबजला आहे. ईदला अवघे दोन दिवस राहिल्याने गुरुवारी (ता. ७) सायंकाळी मुस्लिम बांधवांनी भर पावसात बोकड खरेदीसाठी मोठ्या प्रमाणावर गर्दी केली होती. १५ हजारांपासून ५० हजारापर्यंत बोकड विक्रीस आले आहे. याशिवाय काही नागरिकांनी राजस्थान, पंजाबी प्रजातीचे बोकड सुद्धा विक्रीस आणले आहे. ७० हजारांपासून दीड लाखांपर्यंत हे विशेष बोकड खरेदी विक्री झाले. यंदा बाजारात बोकड आवक मोठ्या प्रमाणावर होती.

राजस्थान, पंजाबी बोकडाचे आकर्षण

बकरी ईदमध्ये कुर्बानी धार्मिक विधीस अतिशय महत्त्व आहे. असे असले तरी कुर्बानीसाठी असणारे बोकड सुदृढ असणे तितकेच आवश्यक आहे. त्यामुळे मुस्लिम बांधव रकमेची चिंता न करता चांगल्या दर्जाचा बोकड खरेदी करत असतात. त्यानिमित्त राजस्थान, पंजाबी प्रजातीचे बोकडदेखील बाजारात विक्रीस येत असतात. काही जणांनी या वर्षीदेखील असे बोकड विक्रीस आणले आहे. त्यांची उंची, शरीर बांध्यामुळे ते सर्वांचे आकर्षण ठरत आहे. जुने नाशिकमधील काही मुस्लिम बांधवांनी अशा बोकडांची खरेदी केली आहे.