एकीकडे "बालभारती''ची अनेक पुस्तके गुदामात पडून...अन् विद्यार्थी मात्र पुस्तकाच्या प्रतीक्षेत!

नाशिक : (सिडको) "बालभारती'कडून सर्वशिक्षा अभियानांतर्गत मोफत पुस्तकांव्यतिरिक्त व्यापारी वर्गाला पहिली ते आठवीपर्यंतची इंग्रजी माध्यम तसेच नववी ते बारावीची इंग्रजी व मराठी माध्यमाची पुस्तके खुल्या विक्रीसाठी दिली जातात. मागील वर्षी 20 लाख रुपये किमतीच्या पुस्तकांची खुली विक्री करण्यात आली होती. या वर्षी अवघ्या साडेसात लाखांपर्यंत पुस्तक विक्री झाली आहे. याचाच अर्थ 35 टक्केच विक्री झाली असून, 65 टक्के पुस्तक विक्री होणे बाकी आहे. 

"बालभारती'लाही चांगलाच फटका

लॉकडाउन व शाळांची सद्यःस्थिती पाहता विक्रेत्यांनी पुस्तक खरेदीत या वर्षी आखता हात घेतला असल्याचे दिसून आले आहे. सर्वशिक्षा अभियानांतर्गत 95 टक्के पुस्तके वाटप करण्यात आली आहेत. त्यात 94 लाख 20 हजार 166 पुस्तकांची मागणी होती. त्यांपैकी 80 लाख 42 हजार 24 पुस्तकांचे वाटप करण्यात आले. पाच लाख 65 हजार 905 पुस्तकांचे वाटप बाकी आहे. महाराष्ट्र राज्य पाठ्यपुस्तक भांडार व वितरण केंद्रातर्फे व्यापारी वर्गाला वाटप करण्यात येणाऱ्या खुल्या विक्रीतील पुस्तकांमध्ये थोडीथोडकी नव्हे तर तब्बल 65 टक्‍क्‍यांपेक्षाही अधिकने घट झाली आहे. कोरोनाच्या पार्श्‍वभूमीवर "बालभारती'लाही चांगलाच फटका बसला असल्याचे सूत्रांनी सांगितले. 

हेही वाचा > अंधश्रध्देचा खेळ आणि राज्यस्तरीय रॅकेटचा पर्दाफाश..मुंबईतील पोलिस अधिकाऱ्यासह १९ जण सामील

नऊ तालुक्‍यांतील विद्यार्थी पुस्तकांच्या प्रतीक्षेत 

बालभारतीकडे आजअखेर "एकात्मिक' पुस्तके येणे बाकी आहे. यामध्ये पहिली ते नववीपर्यंतच्या एकूण पाच लाख 65 हजार 905 पुस्तकांचे वाटप करण्यात येणार आहे. ही पुस्तके महापालिका हद्दीतील नाशिक, मालेगाव, जळगाव व धुळे तसेच निफाड, शिंदखेडा, नवापूर, चोपडा या तालुक्‍यांत वाटप केली जाणार आहेत.

हेही वाचा > भुजबळ संतापले...अधिकाऱ्यांना घेतले फैलावर...नेमके काय घडले?