Nashik News: नाशिक विभागामधील 2 हजार 904 वाड्यांसह वस्त्या अन रस्त्यांची जातिवाचक नावे बदलली

Nashik News : राज्यातील रस्ते, वाड्या, वस्त्यांची जातिवाचक नावे बदलून महापुरुष व लोकशाही मूल्यांशी निगडित नावे देण्याचा निर्णय समाजकल्याण विभागाने घेतला.

त्या अनुषंगाने नाशिक विभागात २ हजार ९०० हून अधिक जातिवाचक रस्ते, वाड्या, वस्त्यांची नावे बदलण्यात आली आहे. विभागाचे हे काम समाधानकारक असल्याची माहिती विभागीय आयुक्त राधाकृष्ण गमे यांनी दिली.

विभागीय आयुक्तालयातील समिती कक्षात विभागीय दक्षता व नियंत्रण समिती, महाराष्ट्र राज्यातील गावांची, वस्त्यांची व रस्त्यांची जातिवाचक नावे बदलून नवीन नावे देण्याबाबतच्या विभागीय समितीची बैठक व तृतीयपंथीयांच्या हक्कांचे संरक्षण आणि कल्याण मंडळ व इतर आनुषंगिक विषयांचा आढावा बैठक झाली.

यावेळी श्री. गमे बोलत होते. विशेष पोलिस महानिरीक्षक बी.जी शेखर पाटील, विभागातील सर्व जिल्हाधिकारी, सर्व पोलिस आयुक्त व पोलिस अधीक्षक, सर्व जिल्हा परिषदांचे मुख्य कार्यकारी अधिकारी, समाजकल्याण विभागाचे प्रादेशिक उपायुक्त माधव वाघ आदी उपस्थित होते.

जातिवाचक नावे बदलण्यात आलेल्यांमध्ये महापालिका क्षेत्रातील १६९, नगरपालिका क्षेत्रातील २६६ व ग्रामपंचायत क्षेत्रातील २ हजार ४६९ ठिकाणांचा समावेश आहे.

हेही वाचा : Credit Card फसवणूक....काय घ्याल काळजी?

तृतीयपंथी कल्याण समितीच्या बैठकीत तृतीयपंथीयांना कौशल्यावर आधारित प्रशिक्षण देण्यासाठी उपाययोजना करण्याचे व त्यांच्यासाठी ओळखपत्र वाटप करण्यासाठी शिबिर घेण्याचे निर्देश श्री. गमे यांनी दिले.

विभागीय दक्षता व नियंत्रण समितीच्या गेल्या तीन महिन्याच्या कालावधीत घडलेल्या गुन्ह्यांचा जिल्हावार आढावा घेण्यात आला. अत्याचारग्रस्तांना देण्यात आले अर्थसहाय व त्यासंबंधीच्या उपाययोजना याबाबत सर्व यंत्रणांनी दक्षता घेणे आवश्यक असल्याचे श्री. गमे यांनी सूचित केले.

तसेच अंधश्रद्धा निर्मूलन व जादूटोणा विरोधी कायद्याच्या अनुषंगाने समाजकल्याण विभागाने याबाबत व्यापकस्तरावर जनजागृती करण्यासाठी मोहीम राबवावी, असेही श्री. गमे यांनी स्पष्ट केले.