Nashik Crime News : नाशिकमध्ये गुन्हेगारी शिगेला! चोरट्यांनी पळवलं केंद्रीय मंत्र्यांच्या आईचे मंगळसूत्र

नाशिक येथे चक्क केंद्रीय मंत्र्यांच्या आईचं मंगळसूत्र चोरट्यांने पळवल्याचा धक्कादायक प्रकार समोर आला आहे. नाशिकच्या आरटीओ परिसरात बाईकवर आलेल्या चोरट्यांनी केंद्रीय मंत्री भारती पवार यांच्या आईचं मंगळसूत्र पळवलं. बाईकवरून आलेल्या चोरांनी दोन ते अडीच तोळ्यांची सोन्याची पोत हिसकावल्याची घटना घडल्याने नाशिक शहरात सामान्यांच्या सुरक्षेचा प्रश्न ऐरणीवर आला आहे.

मिळालेल्या माहितीनुसार, केंद्रीय मंत्री भारती पवार यांच्या मातोश्री शांताबाई बागुल या सायंकाळी सहा ते सात वाजेच्या सुमारास भाजीपाला घेण्यासाठी परिसरात असलेल्याच भाजी मार्केटमध्ये जात होत्या. यावेळी दुचाकीवरून आलेल्या दोघांनी त्यांच्या गळ्यातली सोन्याची पोत हिसकावली. यावेळी परिसरामध्ये जास्त वर्दळ नसल्यामुळे कोणाला आवाज देता आला नाही असे शांताबाई बागुल यांनी सांगितलं. दरम्यान चेनस्नॅचिंगच्या या घटनेमुळे नाशिक शहरातील गुन्हेगारीने कळस गाठल्याच पाहायला मिळत आहे.

नेमकं काय घडलं?

नाशिकच्या आरटीओ ऑफिस परिसरातील दुर्गा नगर येथे घडलेल्या या प्रकाराबद्दल भारती पवार यांच्या मातोश्रींनी स्वतः माहिती दिली. त्यांनी माझ्या गळ्यात हात टाकला. पोत हिसकून घेतली. पोत गेल्याचं मला कळलं. ते हळूहळू निघून गेले. पण त्यावेळी तिथे कोणी माणसेच नव्हती. ते पुढे जाऊन वळाले आणि बघत होते मी काही ओरडते का ते. पण मला काहीच सुचेनासे झाले. दोघेही स्कूटीवर आले होते, अशी माहिती भारती पवार यांच्या आईंनी साम टीव्हीशी बोलताना दिली.