नाशिक : ट्रॅक्टरखाली सापडून चिमुरड्याचा मृत्यु

नाशिक : उघड्या डीपीमुळे आठ वर्षीय मुलाचा मृत्यु झाल्याची दुर्दैवी घटना नुकतीच घडलेली असतानाच, गंगापूर शिवारात ट्रॅक्टरवरून तोल गेला आणि चाकाखाली सापडून पाच वर्षांच्या मुलाचा दुर्दैवी मृत्यु (Death) झाल्याची घटना घडली. राघव दिनकर शिंदे (५, रा. शिंदे चाल, ध्रुवनगर, गंगापूर रोड) असे मयत मुलाचे नाव असून, याप्रकरणी पित्याविरोधात गुन्हा दाखल करण्यात आला आहे. (child died under tractor Nashik News)

सदरील घटना रविवारी (ता.३) दुपारी घडली आहे. दिनकर शिंदे (३८) यांनी ट्रॅक्टरला पाण्याचा टँकर जोडला. त्यावेळी त्यांनी ट्रॅक्टरवर त्यांच्या डाव्या बाजुला त्यांचा पाच वर्षांचा मुलगा राघव यास बसविले. ट्रॅक्टर चालू करून ते चालवित असताना, काही अंतरावर गेले. याच दरम्यान त्यांचा मुलगा राघव याचा तोल गेला आणि तो ट्रॅक्टरवरून खाली पडला. या दूर्घटनेमध्ये राघव ट्रॅक्टरच्या डाव्या बाजुकडील चाकाखाली सापडला आणि गंभीररित्या जखमी होऊन या दर्दैवी घटनेत त्याचा मृत्यु झाला. याप्रकरणी गंगापूर पोलिस ठाण्यामध्ये पिता दिनकर शिंदे यांच्याविरोधात गुन्हा दाखल करण्यात आला आहे. अधिक तपास उपनिरीक्षक शेंडेकर हे करीत आहेत.