Diwali 2023: आठवडाभरात लाखो रुपयांची उलाढाल; दुकानांपेक्षा रस्त्यावरील खरेदीस ग्राहकांची पसंती

Diwali 2023: सातपूर, अंबड औद्योगिक वसाहतीतील कष्टकऱ्यांच्या खिशात बोनसची रक्कम पडताच खरेदीचा उत्साह अनुभवण्यास मिळाला. मात्र अनेकांनी दुकानांपेक्षा रस्त्यावरील खरेदीला प्राध्यान्य दिले. (Consumer preference for street shopping over shop nashik news)

औद्योगिक वसाहतीतील हाताच्या बोटावर मोजता येतील इतक्या आस्थापनांनी पन्नास हजारांपासून ते दीड ते दोन लाखांच्या बोनसचे वाटप केले. परंतु बहुसंख्य आस्थापनांत केवळ एक महिन्याचे वेतन बोनस देण्यात आले, त्यामुळे कष्टकऱ्यांनी दुकानातील खरेदीपेक्षा रस्त्यावरील खरेदीला पसंती दिली.

शालिमार, मेन रोड, दहिपूल, रविवार पेठ सगळीकडे हेच चित्र होते. फुलांबरोबरच आकाशकंदील निर्मितून व विक्रीतूनही अनेकांच्या हातात लक्ष्मी आली.

गेल्या आठ-दहा दिवसांपासून बाजारपेठेत गर्दी आहे.

व्यवसाय ठप्प

अनेक मोठ्या व्यावसायिकांनी खास दीपावलीसाठी कोट्यवधी रुपयांची गुंतवणूक केली. परंतु ग्राहकांनी यंदा मोठ्या दुकानांकडे पाठ फिरवत रस्त्यावरील हातगाडीवर किंवा छोट्या दुकानांत खरेदीस प्राध्यान्य दिल्याने अनेक मोठे व्यावसायिक ग्राहकांच्या प्रतीक्षेत होते.