कोरोनामुळे वाढले पश्चिम पट्ट्यातील आदिवासींचे स्थलांतर; शहरात मजुरीकडे कल 

गिरणारे/गंगापूर : कोरोना महामारीत मार्चपासून गाव-पाड्यावर गेलेले आदिवासी नागरिक रोजगारासाठी ऑक्टोबरपासूनच लाकूडफाटा, साधने घेऊन कुटुंबासह गिरणारे, गंगापूर नाका, सातपूर व उपनगरांत रोजगारासाठी येत आहेत. आजपर्यंत हजारो आदिवासी मजुरीसाठी गाव सोडून बाहेरगावी गेल्याने कित्येक गावांत वयस्कर मंडळी व लहान मुलेच आढळतात.

रोजगारासाठीच हे स्थलांतर यंदा मोठ्या प्रमाणात आहे. रोजगार हमी कायद्याबाबत ग्रामपंचायती उदासीन असल्याने व लोकप्रतिनिधी, प्रशासनाच्या अनास्थेमुळे स्थलांतर यंदाही वाढले आहे. 

पदवीधर असलेली शिकलेली मुलांचाही  समावेश

नाशिक तालुक्याचा आदिवासी बहुल पश्चिम भाग, तसेच हरसूल, ठाणापाडा, खरशेत, वाडा, पळसन, आडगाव, देवळा ते थेट गुजरात सीमेवरून मोठ्या प्रमाणात कित्येक कुटुंबे रोजगारासाठी गावे सोडून गेले आहेत. गावात उन्हाळ्यात पिण्याच्या पाण्याचा अभाव, स्थानिक रोजगार देणाऱ्या व्यवस्थांची उदासीनता यामुळे पदवीधर शिकलेली मुले, आठ ते १५ वयोगटांतील मुले, मुली, महिला, पुरुष रोजगारासाठी गावे सोडून जातात. पावसाळ्यात भात, नागली पिके काढल्यावर हे आदिवासी कुटुंबासह उपनगरात जाऊन टोमॅटो काढणी, फवारणी, मशागत, द्राक्ष छाटणी, डिपिंग, काढणी, पॅकिंग अशी कामे शेतकऱ्यांकडून घेतात. काही स्थानिक मजुरांचे ठेकेदार कामे ठरवून मजूर पुरवतात. या वर्षी हातात कामे नसल्याने नाशिक जिल्ह्याच्या पश्चिम आदिवासी पट्ट्यातील असंख्य कुटुंबे रोजगारासाठी बाहेर पडली आहेत, हे चक्र मेपर्यंत असेल. 

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश

 

आम्ही दर वर्षी पोटापाण्यासाठी नाशिक, सिन्नर, दिंडोरी, निफाड तालुक्यांत शेतमजुरीस जातो. पावसाळ्यातील सोंगणी आटोपून आम्ही गिरणारेच्या मजूर बाजारात जातो. एक जीप त्यात कोंबलेले ४० हून अधिक प्रवासी, असेच गिरणारे किंवा नाशिक गाठतो. मजूर बाजारात रस्त्यावर उघड्यावर जिथे जागा मिळेल तिथे उभे राहतो. 
-हिरामण रिंजड, शेतमजूर, गावंध 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप