Nashik Civil Hospital: सिव्हिलमध्ये सावळागोंधळ; जिवंत महिलेस दाखविले मृत

Nashik Civil Hospital : येथील जिल्हा रुग्णालयातील भोंगळ कारभार पुन्हा एकदा उघडकीस आला आहे. जिवंत महिलेस मृत दाखविण्यात आल्याचा प्रकार घडला आहे.

सदरची बाब काहीवेळाने लक्षात येताच आरोग्य यंत्रणा जागी झाली. त्यानंतर नव्याने कागदोपत्री महिला अनोळखी मृत आणि जिवंत महिला उपचार घेत असल्याचा उल्लेख करण्यात आला. (Dead shown to living woman in civil hospital nashik news)

अनोळखी वयोवृद्ध महिला ३ नोव्हेंबरला दुपारी नाशिक रोड बसस्थानकाजवळ आजारपणाच्या स्थितीत मिळून आली होती. वयोवृद्ध महिलेस रुग्णवाहिकेमार्फत जिल्हा रुग्णालयात दाखल करण्यात आले.

महिलेवर रुग्णालयात ५ नोव्हेंबरपर्यंत उपचार सुरू होते. उपचारादरम्यान महिलेचा ५ नोव्हेंबरला सकाळी ११ ला मृत्यू झाला, अशी नाशिक रोड पोलिस ठाण्यात नोंद करण्यात आली आहे. या संदर्भात जिल्हा रुग्णालय पोलिस चौकीतून नाशिक रोड पोलिसांना कळविण्यात आले होते.

अनुसया सीताराम माळी (रा. जालना) या ४ नोव्हेंबरला दुपारी १ च्यादरम्यान भद्रकाली हद्दीत अशक्तपणा आल्याने बेवारस आढळून आल्या. त्यांना रुग्णवाहिकेतून जिल्हा रुग्णालयात दाखल करण्यात आले होते. रुग्णालयात उपचार सुरू असताना डॉक्टरांनी तपासणी करत तिला मृत घोषित केले. प्रत्यक्षात त्या जिवंत असल्याचे आढळून आले.

अनोळखी मृत महिलेचे नाव अनुसया माळी असल्याचे संबंधितांकडून पोलिस व आरोग्य यंत्रणेला सांगण्यात आले. प्रत्यक्षात अनुसया माळी यांचा मृत्यू झाला नसून, त्या उपचार घेत असल्याचे समोर आले. यावरून जिल्हा रुग्णालयाचा भोंगळ कारभार पुन्हा उघड झाला.