Engineering Admission : अभियांत्रिकीच्‍या नोंदणीची या तारखेपर्यंत मुदत

Engineering Admission : इयत्ता बारावीनंतर अभियांत्रिकी क्षेत्रात उच्च शिक्षण घेण्यासाठी प्रवेश प्रक्रियेला सुरवात झालेली आहे. शैक्षणिक वर्ष २०२३-२४ च्‍या प्रवेश प्रक्रियेत सहभागी होण्यासाठी पात्रताधारक विद्यार्थ्यांना ३ जुलैपर्यंत नोंदणी करायची आहे.

नोंदणीकृत विद्यार्थ्यांना प्रवेश फेरीत सहभागी होता येईल. (Deadline for registration of engineering till 3 july nashik news)

दरम्‍यान ४ वर्षे कालावधीचा पदवी अभ्यासक्रम तसेच पाच वर्षे कालावधीचा पदवी व पदव्‍युत्तर पदवी (संयुक्‍त) अभ्यासक्रमाच्‍या प्रवेशासाठी नोंदणी करता येणार आहे.

काही दिवसांपूर्वी एमएचटी-सीईटी परीक्षेचा निकाल जाहीर झाल्‍यापासून विद्यार्थ्यांसह पालकांना पुढील प्रवेश प्रक्रियेची प्रतीक्षा लागून होती. ही प्रतीक्षा संपली असून, नोंदणी प्रक्रियेला सुरवात झालेली आहे. एमएचटी-सीईटी परीक्षेत पीसीएम ग्रुपचे गुण आणि इयत्ता बारावीतील गुणांच्‍या आधारावर अभियांत्रिकी शाखेत प्रवेशाची संधी उपलब्‍ध होणार आहे.

राज्‍य सामाईक प्रवेश परीक्षा कक्षातर्फे शनिवार (ता.२४) पासून नोंदणी प्रक्रियेला सुरवात केली आहे. त्‍यानुसार विद्यार्थ्यांनी संकेतस्‍थळावर ऑनलाइन नोंदणी करून आवश्‍यक कागदपत्रांची पूर्तता करण्यासाठी ३ जुलैपर्यंत मुदत दिलेली आहे.

हेही वाचा : Credit Card फसवणूक....काय घ्याल काळजी?

या मुदतीत कागदपत्र पडताळणीची प्रक्रिया पूर्ण करण्यासाठी ४ जुलैपर्यंत मुदत असणार आहे. विद्यार्थी ई-स्‍क्रुटीनी किंवा प्रत्‍यक्ष स्‍क्रुटीनीचा पर्याय निवडून कागदपत्रे पडताळणी करू शकतील.

पुढील वेळापत्रकाची प्रतीक्षा

सध्या नोंदणीची मुदत जाहीर केलेली असून, प्रारूप व पुढे अंतिम गुणवत्ता यादी प्रसिद्धी व प्रवेश फेऱ्यांच्या वेळापत्रकाची अद्याप प्रतीक्षा कायम आहे. नोंदणीची मुदत संपल्‍यानंतर सविस्‍तर वेळापत्रक जाहीर केले जाण्याची शक्‍यता आहे.

बी.फार्मसीची नोंदणी नाहीच

औषधनिर्माणशास्‍त्र शाखेतील पदवी अभ्यासक्रम बी.फार्मसीची नोंदणी सायंकाळी उशिरापर्यंत सुरु झालेली नव्‍हती. अभियांत्रिकीसोबतच फार्मसीच्‍या नोंदणीला सुरवात होणार असल्‍याचे सांगण्यात आले होते. परंतु संकेतस्‍थळावर यासंदर्भात तपशील जारी केलेला नव्‍हता.