महामेट्रो कंपनीकडून महापालिकेकडे प्रत्येकी दहा एकर जागेची मागणी

नाशिक : शहरात प्रस्तावित टायरबेस मेट्रो रेल्वेसाठी महामेट्रो (mahametro) कंपनीने महापालिकेकडे (nashik carporation)डेपो व कोचेससाठी नाशिकरोड(nashik road) व गंगापूर रोड येथे प्रत्येकी दहा एकर जागेची मागणी पत्राद्वारे केली आहे. त्यानुसार मिळकत विभागाला तातडीने जागेचा शोध घेण्याच्या सूचना आयुक्त कैलास जाधव यांनी दिल्या.

शहरातील सार्वजनिक वाहतूक व्यवस्था बळकट करण्यासाठी शहरात टायरबेस मेट्रो प्रकल्प राबविला जाणार आहे. केंद्रीय अर्थसंकल्पात प्रकल्पासाठी २०९२ कोटी रुपयांची तरतूद करण्यात आली आहे. प्रकल्पाच्या खर्चासाठी केंद्र सरकार ७०७ कोटी रुपये, तर १, १६१ कोटी कर्ज स्वरूपात उभारले जाणार आहे. राज्य सरकार, सिडको व महापालिका २५५ कोटी रुपये देणार आहे. महापालिकेकडे निधी नसल्याने प्रकल्प उभारणीसाठी जागा उपलब्ध करून देणार आहे. २०२३ पर्यंत मेट्रो प्रकल्पाची मुदत असली तरी उद्‌घाटन लांबले आहे.

उत्तर प्रदेश निवडणुकांच्या पार्श्‍वभूमीवर नाशिक व पंतप्रधान नरेंद्र मोदी यांच्या वाराणसी मतदारसंघात एकाच वेळी प्रकल्पाचे उद्‌घाटन करण्याचे नियोजन होत असल्याची चर्चा आहे. त्यातून विलंब होत असल्याचे बोलले जात आहे. दरम्यान, केंद्रीय मंत्रिमंडळाची मंजुरी मिळाली नसली तरी महामेट्रोने पत्राद्वारे महापालिकेकडे दहा एकर जागा डेपोसाठी मागितली आहे. त्यासंदर्भात पत्रव्यवहार करण्यात आला आहे. नाशिक रोड व गंगापूर रोड या दोन ठिकाणी प्रत्येकी १० एकर जागेची मागणी नोंदविण्यात आली आहे. मिळकत विभागाकडून नाशिक रोड, गंगापूर रोडसह चेहेडी येथे जागेचा शोध घेतला जात आहे.

महापालिकेकडे निधी नसल्याने जागा देण्याची जबाबदारी घेतली आहे. त्यानुसार महामेट्रोने केलेल्या मागणीनुसार डेपो व कोचसाठी नाशिक रोड व गंगापूर येथे दहा एकर जागा दिली जाणार आहे.

- कैलास जाधव, आयुक्त, महापालिका