Dhule Lok Sabha Constituency : धुळ्यासाठी मतदार संघातीलच उमेदवार द्यावा : डॉ. शेवाळे

Dhule Lok Sabha Constituency : धुळे लोकसभा मतदारसंघात महाविकास आघाडीकडून उमेदवारीसाठी काँग्रेसचे जिल्हाध्यक्ष डॉ. तुषार शेवाळे यांचा दावा कायम आहे. डॉ. शेवाळे काँग्रेसशी एकनिष्ठ आहेत. निवडणुकीत मतदारसंघातीलच उमेदवार द्यावा, अशी मागणी त्यांनी पक्षश्रेष्ठींकडे केली आहे. धुळे लोकसभा मतदारसंघात महायुतीने भाजपचे विद्यमान खासदार डॉ. सुभाष भामरे यांची उमेदवारी जाहीर केली आहे. (Dhule Lok Sabha Constituency dr tushar shewale statement of Candidates )

त्यांनी प्रचारदेखील सुरू केला आहे. महायुतीत धुळ्याची जागा काँग्रेसकडे आहे. पक्षाकडून नाशिक जिल्हाध्यक्ष डॉ. तुषार शेवाळे व धुळे येथील पक्षनेते श्‍याम सनेर यांच्या नावाची सुरवातीपासूनच चर्चा आहे. दोघांपैकी एकाला उमेदवारी मिळेल, अशी शक्यता होती. काही दिवसांपासून नाशिक व नंदुरबार भागांतील काही जणांची नावे चर्चेत येत आहेत.  (latest marathi news)

डॉ. शेवाळे व त्यांच्या समर्थकांनी काँग्रेसच्या वरिष्ठ नेत्यांची भेट घेऊन मतदार संघातीलच उमेदवार देण्याचा आग्रह धरला आहे. पंधरा वर्षांपासून आपण पक्षाकडे उमेदवारी मागत आहोत, उमेदवारी मिळाली नसली तरी प्रत्येकवेळी प्रामाणिकपणे पक्षासाठी काम केले. या वेळी पक्षनेतृत्वाने संधी द्यावी.

भाजपचे आव्हान पेलण्यासाठी बाहेरचा उमेदवार देऊ नये. तसे झाल्यास मतदारसंघातील महाविकास आघाडीच्या कार्यकर्त्यांच्या भावना दुखावतील. याचा विपरीत परिणाम निवडणुकीवर होईल, अशी भूमिका त्यांनी पक्षनेतृत्वापुढे मांडल्याचे सांगण्यात आले. स्थानिक जनतेची भावना लक्षात घेऊन उमेदवार द्यावा, अशी मागणी काँग्रेसचे तालुकाध्यक्ष डॉ. राजेंद्र ठाकरे यांनी केली आहे.