Electricity Companies Strike : वीज संपामुळे जमावबंदी आदेश

नाशिक रोड : सहाय्यक पोलिस आयुक्त डॉ. सिध्देश्वर धुमाळ यांनी वीज कंपनीच्या खासगीकरणाच्या धोरणाविरोधात कर्मचा-यांची संयुक्त कृती समिती, राज्य वीज कर्मचारी अधिकारी व अभियंता संघर्ष समिती तसेच राज्य वीज कर्मचारी अधिकारी या तीन संघटनांनी ४ जानेवारी ते ६ जानेवारी असा ७२ तासांचा राज्यव्यापी पुकारेलाल संप लक्षात घेऊन एकलहरे आस्थापनेच्या आवारात व्दारसभा, धरणे आंदोलन, रास्ता रोको, निदर्शने करण्यास मनाई आदेश जारी केला आहे. (Electricity Companies Strike Prohibition order due to electricity strike nashik news)

हेही वाचा : जोखमीचे भान राखूनच करा SIP मध्ये गुंतवणूक

धुमाळ यांच्या मनाई आदेशाचा आशय असा की, गेल्या वर्षी मार्चमध्येही दोन दिवस संप पुकारण्यात आला होता. त्यावेळी कामगार व युनियन पदाधिका-यांनी एकलहरे औष्णिक वीज केंद्रातील फिडर बंद केले होते. त्यावेळी वीज केंद्रात तांत्रिक बिघाड झाला होता. आता होणा-या संपात असा प्रकार घडल्यास वीज संच बंद पडून वीज पुरवठा खंडीत होईल.

या संप कालावधीत कोणताही संघर्ष निर्माण होऊन कायदा सुव्यवस्थेला बाधा पोहोचून जनजीवन विस्कळीत होण्याची शक्यता आहे. त्यामुळे वरील तिन्ही संघटनांना एकलहरे आस्थापनेच्या आवारात व दोनशे मीटर परिघात व्दारसभा, धरणे आंदोलन, रास्ता रोको, निदर्शने करण्यास मनाई करण्यात येत आहे.

संपकऱ्यांनी कामावर जाणा-या अधिकारी, कर्मचाऱ्यांना तसेच वाहनांना प्रतिबंध करू नयेत. वरील परिसरात लाठ्याकाठ्या, शस्त्रे, अग्नीशस्त्रे, ज्वलनशील पदार्थ, असीड, घातकशस्त्रे आदी घेऊन फिरण्यास मनाई करण्यात आली आहे