नाशिक : कारवाईचा बडगा उगारताच कर्मचाऱ्यांची यादी हातात

नाशिक : महापालिका निवडणुकीसाठी कर्मचाऱ्यांची आवश्‍यकता भासणार आहे. त्यामुळे प्रशासनाने शहरातील १३० शासकीय व निमशासकीय संस्थांशी पत्रव्यवहार निवडणुकीसाठी उपलब्ध होणाऱ्या कर्मचाऱ्यांची यादी मागविली होती. परंतु, निवडणूक तारखांच्या घोळाचा लाभ घेत १३० संस्थांनी कर्मचाऱ्यांची यादी न कळविता असहकार सुरू केला. त्यामुळे प्रशासनाने गुन्हे दाखल करण्याची नोटीस काढताच गुरुवारी (ता. १९) अखेर आठ हजारांहून अधिक कर्मचाऱ्यांची निवडणुकीसाठी यादी सादर करण्यात आली.

महापालिका निवडणुका सप्टेंबर किंवा ऑक्टोंबर महिन्यात होण्याची शक्यता आहे. परंतु, त्यापूर्वी राज्य निवडणूक आयोगाच्या सूचनेनुसार तयारी करणे गरजेचे आहे. त्याचाच एक भाग म्हणून निवडणुकीसाठी एका बूथवर पाच याप्रमाणे सोळाशे बूथवर कर्मचाऱ्यांची नियुक्ती केली जाणार आहे. आठ हजार कर्मचाऱ्यांची आवश्‍यकता, तसेच अतिरिक्त वीस टक्के सोळाशे असे एकूण नऊ हजार सहाशे कर्मचारी निवडणूक कामासाठी लागणार असल्याने महापालिका प्रशासनाकडून शासकीय व निमशासकीय अशा ४५० संस्थांकडून कर्मचाऱ्यांची यादी मागविण्यात आली. परंतु, अद्यापपर्यंत शासकीय संस्थांकडून हवा तसा प्रतिसाद न मिळाल्याने गेल्या आठवड्यात गुन्हे दाखल करण्याच्या नोटिसा बजावण्यात आल्या. कुठलाच प्रतिसाद न देणाऱ्या १३० संस्थांना नोटीस बजावल्यानंतर त्यातील सत्तर टक्के संस्थांनी प्रतिसाद दिल्याची माहिती महापालिकेच्या सूत्रांनी दिली. आठ हजार कर्मचाऱ्यांची यादी महापालिका प्रशासनाला प्राप्त झाली आहे. दरम्यान, नोटीस बजावूनही प्रतिसाद न देणाऱ्या संस्थांवर कारवाई केली जाणार आहे.