Student Evaluation Test: मूल्यमापन चाचणीचे वेळापत्रक जाहीर; खासगी अनुदानित शाळांतील विद्यार्थ्यांचाही समावेश

Student Evaluation Test : राज्यातील शिक्षण पद्धतीचे अध्यापन, अध्ययन आणि परिणाम यांचे बळकटीकरण (स्टार्स) कार्यक्रमांतर्गत सर्व शासकीय व स्थानिक स्वराज्य संस्थांच्या शाळांमध्ये शिकणाऱ्या विद्यार्थ्यांबरोबरच खासगी अनुदानित शाळांमध्ये शिकणाऱ्या विद्यार्थ्यांची अध्ययन निष्पत्ती निश्चित करण्यासाठी संकलित मूल्यमापन चाचणी घेण्याचे वेळापत्रक जाहीर करण्यात आले आहे.

त्यानुसार ३० ऑक्टोबर ते २ नोव्हेंबर या कालावधीत इयत्ता तिसरी ते आठवीच्या विद्यार्थ्यांची भाषा, गणित व इंग्रजी या विषयांची संकलित मूल्यमापन चाचणी घेण्यात येणार आहे. राज्यातील खासगी अनुदानित शाळांमधील तिसरी ते आठवीच्या विद्यार्थ्यांसाठी संकलित मूल्यमापन चाचणी घेण्यास राज्य सरकारने मान्यता दिली आहे.

तसेच त्यासाठी १४ कोटी ६० लाख रुपयांच्या खर्चालाही मंजुरी दिली आहे. त्यानुसार दोन चाचण्या घेण्यास मान्यता देण्यात आली आहे. (Evaluation test schedule announced nashik news)

राज्य शैक्षणिक संशोधन आणि प्रशिक्षण परिषदेने सादर केलेल्या प्रस्तावाच्या अनुषंगाने शालेय शिक्षण विभागाने मान्यतेचा शासन निर्णय प्रसिद्ध केला आहे. सध्या राज्यभरात स्टार्स ही केंद्र पुरस्कृत योजना राबविण्यात येत आहे. त्याअंतर्गत २०२३-२४ या शैक्षणिक वर्षात राज्यातील शासकीय आणि स्थानिक स्वराज्य संस्थांच्या शाळांतील तिसरी ते आठवीच्या विद्यार्थ्यांसाठी नियतकालिक मूल्यांकन चाचण्या घेतल्या जाणार आहेत.

खासगी अनुदानित शाळांतील विद्यार्थ्यांसाठी मोठा निर्णय

शासकीय व स्थानिक स्वराज्य संस्थांच्या शाळांमध्ये शिकणाऱ्या विद्यार्थ्यांइतकेच विद्यार्थी खासगी अनुदानित शाळांमध्ये शिकतात. अध्ययन निष्पत्ती निश्चित करण्यासाठी नियतकालिक मूल्यांकन चाचण्या हा महत्त्वपूर्ण उपक्रम आहे.

राज्यातील उच्च प्राथमिक शाळांमधील जवळपास निम्मे विद्यार्थी या उपक्रमापासून वंचित राहिल्यास संपादणूक पातळीत वाढ करण्याच्या प्रयत्नांना खीळ बसेल, ही वस्तुस्थिती विचारात घेऊन खासगी अनुदानित शाळांमधील तिसरी ते आठवीच्या विद्यार्थ्यांसाठी संकलित मूल्यमापन चाचणी एक आणि दोन या दोन चाचण्या आयोजित करण्यास शासनाने मान्यता देण्यात आल्याचे नमूद करण्यात आले आहे.

असे आहे संकलित चाचणीचे वेळापत्रक :

तारीख : विषय : इयत्ता

३० ऑक्टोबर : मराठी : तिसरी ते आठवी

३१ ऑक्टोबर : गणित : तिसरी ते आठवी

०१ नोव्हेंबर : इंग्रजी : तिसरी ते आठवी

वेळ :

तिसरी/ चौथीसाठी : ९० मिनिटे

पाचवी/ सहावीसाठी : ९० मिनिटे

सातवी/ आठवीसाठी : १२० मिनिटे

गुण :

तिसरी/ चौथीसाठी : ३० गुण

पाचवी/ सहावीसाठी : ४० गुण

सातवी/ आठवीसाठी : ५० गुण

(वेळापत्रकानुसार मराठी व गणित विषयासाठी सर्व माध्यमांचा समावेश असून, इंग्रजी विषयासाठी इंग्रजी माध्यमाच्या शाळा वगळण्यात आल्या आहेत. गुण आणि वेळ सर्व विषयांसाठी समान आहेत.)