केंद्राच्या कांदा आयात धोरणाचा फटका; अभोण्यात कांद्याच्या भावात घसरण

नाशिक/अभोणा : येथील कृषी उत्पन्न उपबाजार समिती आवारात मंगळवार(ता.20) रोजीच्या तुलनेने गुरुवार (ता.22) रोजी नऊशे ते एक हजार रुपये प्रतिक्विंटल भावात घसरण झाली. उपबाजारात मालाची वाढलेली आवक, केंद्राने परदेशातील कांद्याची केलेली आयात व व्यापाऱ्यांवर आयकर विभागाचे छापे या सर्वांचा परिणाम म्हणजे कांद्याच्या भावात झालेली घसरण.

शेतकऱ्यांची चिंता अधिक वाढली

एकूण 411 ट्रॅक्टर आवक होती.साधारण सहा हजार क्विंटल मालाची खरेदी झाली.नंबर एक कांद्याला जास्तीतजास्त सात हजार 500 ते आठ हजार 210,नंबर दोन कांद्याला सहा हजार 500 ते सात हजार 500, नंबर तीन कांद्याला पाच हजार 400 ते सहा हजार 500 व खाद कांद्यास एक हजार 300 ते चार हजार रुपये भाव मिळाला.
परतीच्या पावसाने बाजरी, सोयाबीन, मका व काही ठिकाणी साठविलेला कांदा यांचे प्रचंड नुकसान झाले. गेली काही महिने अत्यंत कवडीमोल भावाने शेतकऱ्यांना कांदा विकावा लागला. वाढत्या भावाने थोडीफार नुकसान भरपाई होईल अशी आशा असतानाच, शासनाच्या कांदा आयातीच्या धोरणामुळे शेतकऱ्यांची चिंता अधिक वाढली आहे.

हेही वाचा > क्रूर नियती! नवरात्रीच्या पहिल्याच दिवशी देवीभक्ताचा दुर्देवी अंत; कुटुंबियांचा आक्रोश 

शेतकऱ्यांच्या योग्य मालास योग्य भाव मिळावा हाच कळवण कृषी उत्पन्न बाजार व अभोणा, कनाशी उपबाजार समितीचा प्रामाणिक प्रयत्न आहे.सर्व शेतकरी बांधवांनी आपल्या मालाची योग्य प्रतवारी करून कळवण कृषी उत्पन्न बाजार व अभोणा, कनाशी उपबाजार समितीत कांदा विक्रीस आणावा. तसेच माल विक्रीचे पैसे रोखीने घेऊन जावेत. - धनंजय पवार, सभापती, कृषी उत्पन्न बाजार समिती, कळवण 

हेही वाचा > मध्यरात्रीस खेळ चाले! गायींना भुलीचे औषध देऊन तस्करी; महागड्या गाड्यांचा वापर