चिचोंडी (नाशिक) : येथील ३६ चारी शेजारचा शिवरस्ता खड्डेमय झाल्याने परिसरातील शेतकऱ्यांना त्रास होत आहे. एक किलोमीटर रस्त्यावरील खड्डे येथील दत्तू मढवई यांच्या कुटुंबाने स्वखर्चाने बुजवून अडचण सोडवली आहे.
शेतमाल बाजार समितीत नेताना होणारी कसरत तसेच आता शाळा नियमित सुरू झाल्याने विद्यार्थ्यांची शाळेत जातांना होणारी दमछाक, स्कूल बसची अडचण अशा सर्वांनाच या खराब व खड्डे पडलेल्या रस्त्याचा त्रास होत होता. परिसरातील शेतकऱ्यांनी आठ महिन्यांपूर्वी वर्गणी काढून रस्त्यावरील खड्डे बुजवले होते.
मात्र सततच्या वर्दळीमुळे पुन्हा खड्डे पडल्याने परिसरातील रहिवासी व मालवाहू रिक्षा व्यावसायिक दत्तू मढवई, पत्नी सोनाली मढवई, आई आशाबाई मढवई यांनी स्वतःच्या विहिरीवरील दगड आपल्या छोटा हत्ती गाडीतून रस्त्यावर टाकून तसेच त्यावर मुरूम टाकून एक दिवस श्रमदान करत रस्त्याची दुरुस्ती केली. मढवई कुटुंबाने स्वखर्चाने व श्रमदानातून रस्त्याची दुरुस्ती केल्याने त्यांचे परिसरातून अभिनंदन होत आहे. हा रस्ता रोजगार हमी योजनेतून व्हावा, अशी मागणी दत्तू मढवई व परिसरातील शेतकऱ्यांनी केली आहे. दरम्यान, पेरणीमुळे शेजारील शेतकरी रस्ता दुरुस्तीसाठी येऊ शकले नाहीत. मात्र त्यांनी रस्ता दुरुस्तीबद्दल आभार मानल्याचे दत्तू मढवई यांनी ‘सकाळ’ला सांगितले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
