आमदार खोसकर म्हणताएत...'शेतकऱ्यांनो काळजी करू नका, मी तुमच्यासोबत आहे!'

नाशिक : (वाडीवऱ्हे) इगतपुरी तालुक्यात धरणे, रेल्वे, औद्योगिक वसाहत, रस्ते, समृद्धी महामार्ग आणि आता नवीन रेल्वेमार्ग या सर्व प्रकल्पांमुळे आधीच इगतपुरी तालुक्यातील जनता भूमिहीन झाली आहे, तरीही नवीन रेल्वेमार्ग प्रकल्पासाठी शासन जमीन संपादन करीत आहे. हा शेतकऱ्यांवर मोठा अन्याय आहे. त्यामुळे नवीन रेल्वेमार्गासाठी जमिनी देण्यास तीव्र विरोध केला जाईल, असा इशारा शेतकऱ्यांनी दिला. 

हेही वाचा > अचानक सायरनचा तो धडकी भरविणारा आवाज..नागरिकांत घबराट अन् सुटकेचा निश्वास! काय घडले नेमके?

पाडळी देशमुख (ता. इगतपुरी) येथे आमदार हिरामण खोसकर यांच्या अध्यक्षतेखाली प्रकल्पग्रस्तांची बैठक झाली. त्यात, शेतकऱ्यांनी विरोधाचा इशारा दिला. माजी आमदार काशीनाथ मेंगाळ, काँग्रेस तालुकाध्यक्ष रामदास धांडे, बाळासाहेब कुकडे, कमलाकर नाठे, दशरथ मालुंजकर, भाऊसाहेब धोंगडे वरील सर्व गावांतील शेतकरी मोठ्या प्रमाणात होते. आमदार खोसकर म्हणाले, की अनेक वर्षांपासून इगतपुरीमध्ये अनेक प्रकल्प झाले. त्यात धरण, रेल्वे, औद्योगिक वसाहत, रस्ते, समृद्धी महामार्ग आणि नवीन रेल्वे लाइनसाठी जमीन संपादनाचा प्रस्ताव आहे. 

हेही वाचा > शिवप्रेमींत हळहळ; शिवप्रेमी रितेशची किल्ल्यावरील 'ती' सेल्फी शेवटची ठरली, काय घडले?

इगतपुरी तालुक्यातील घोटी, माणिकखांब, मुंढेगाव , मुकणे, पाडळी देशमुख, गोंदे दुमाला, कुऱ्हेगाव, बेलगाव कुऱ्हे, नंदूरवैद्य, अस्वली ही सगळे गावे प्रकल्पबाधित होणार आहेत. या प्रकल्पाला शेतकऱ्यांचा विरोध आहे. याप्रश्‍नी ज्येष्ठ नेते शरद पवार, महसूलमंत्री बाळासाहेब थोरात, तसेच दोन्ही खासदारांना सोबत घेऊन प्रत्यक्ष पंतप्रधान आणि केंद्रीय रेल्वेमंत्री यांना भेटून हा प्रश्न मार्गी लावणार आहे. मी शेतकऱ्यासोबत आहे, काळजी करू नका, असे आश्वासन त्यांनी दिले. 

संपादन - किशोरी वाघ