Nashik News: सांगा आता जगायचं तरी कसे? शेतकऱ्यांचा सरकारला सवाल! टोमॅटोचा झाला लाल चिखल,भावात निचांकी घसरण

Nashik News : सप्टेंबर उजाडूनही पावसाने पाठ फिरवली आहे. तळहाताच्या फोडाप्रमाणे जपलेले टोमॅटोचे भाव कोसळल्यामुळे उत्पादक शेतकऱ्यांच्या डोळ्यात पाणी आलंय. बाजार समितीत २० किलोच्या क्रेट्‌सला केवळ ५० ते १०० रुपये भाव मिळत आहे.

यामुळे ‘मायबाप सरकार सांगा आता जगायचं तरी कसे, असा सवाल शेतकऱ्यांनी केला आहे. (farmers question to government Tomato crop destroyed price fell to lowest level Nashik News)

१५ दिवसापासून ही घसरण थांबण्याचे नाव घेत नसून एक एकर टोमॅटोसाठी रोपे, मलचीग पेपर, रासायनिक खते, औषधे, तारी, टोकरे, ड्रीपसह मशागतीसाठी जवळपास २ लाख ५० हजार रुपये खर्च येत आहे.

पावसाने ओढ दिल्याने तीव्र पाणीटंचाईला सामोरे जावे लागत आहे. शेतकऱ्यांनी पेरणी केलेले पिकांकडे संपूर्ण खर्च करूनही दुर्लक्ष करावे लागले. त्यामुळे टोमॅटो लागवड केलेल्या बऱ्याच शेतकऱ्यांनी टँकरने पाणी घालून टोमॅटो जगवले.

मात्र, मोठ्या कष्टाने पिकवलेला टोमॅटो ६० ते १०० किलोमीटरचा प्रवास करूनही बाजार समितीत कवडीमोल भाव मिळत आहे. त्यामुळे शेतकऱ्यांचा साधा वाहतूक खर्चही निघणे कठीण झाले आहे.

उत्पादन खर्चाचा विचार केला तर शेतकऱ्यांवर स्वतःच्या खिशातून पैसे टाकण्याची वेळ आली आहे. बाजारभावाबाबत बेभरवशाचे व जुगारी पीक, असे टोमॅटोबाबत पुन्हा एकदा अधोरेखित झाले आहे. बाजारभाव कोसळल्याने मोठ्या अपेक्षेने टोमॅटोची लागवड केलेल्या शेतकऱ्यांची पदरी निशारा येण्याची चिन्हे आहेत. थट्टाचं झाल्याने शेतकरी हवालदिल झाले आहेत.5;

त्यामुळे पिके उभी करण्यासाठी घेतलेले कर्ज फेडायचे कुठून? मुलांचे शिक्षण कसं करावे? परीक्षेची फी कुठून भरावी? कुटुंब कसे चालवावे, असे एक ना अनेक प्रश्न शेतकऱ्यांनी सरकारला विचारलेत. अगोदरच दुष्काळाच्या झळांनी होरपळत असलेला शेतकरी पुन्हा सुलतानी संकटाने हतबल होत आहे.

दिल्लीतील जी २० शिखर परिषद शेतकऱ्यांच्या मुळावर

दिल्लीत सुरू असलेल्या जी २० शिखर परिषदेमुळे दिल्लीत सुरक्षेच्या कारणास्तव बाजार समित्या बंद केल्या आहे. त्यामुळे दिल्लीत खरेदी बंद आहे.

याचा काही प्रमाणात परिणाम स्थानिक बाजारावर झाला असल्याचे पिंपळगाव बसवंत बाजार समितीतील टोमॅटो व्यापाऱ्याने नाव न छापण्याच्या अटीवर सांगितले.