उमा पार्क भागातील पूल खचण्याची भीती; नागरिकांनी अडथळे टाकून रस्ता केला बंद

सिडको (जि. नाशिक) : जोरदार पावसामुळे (Heavy Rain) सिडकोतील शुभम पार्ककडून उमा पार्ककडे जाणारा वाघ मळा येथील रस्त्यावरील पूल (Bridge) खचण्यास सुरवात झाल्याने नागरिक भयभीत झाले आहेत. खबरदारीचा उपाय म्हणून नागरिकांनी स्वतःच अडथळे टाकून हा रस्ता वाहतुकीसाठी बंद केला आहे. अनेक दिवसांपासून येथील रस्त्याची मागणी असतानाही ती पूर्ण होत नसल्याने नागरिकांनी संताप व्यक्त केला आहे.(Fear of bridge collapse in Uma Park area Nashik latest Marathi News)

जुन्या प्रभाग २८ येथील वाघ मळा येथे पावसाळी नाल्यावर पूल बांधलेला आहे. अनेक वर्षे जुना झालेला पूल आधीपासूनच निकृष्ट दर्जाचा बनविलेला आहे. त्यातच सद्यःस्थितीत मोठ्या प्रमाणात पाऊस पडल्याने पूल रस्त्याच्या दोन्ही बाजूंना खचण्यास सुरवात झाली आहे.

योग्य खबरदारी न घेतल्यास पूल पाण्यात वाहून जाण्याची भीती व्यक्त करण्यात येत आहे. खबरदारीचा उपाय म्हणून परिसरातील युवक रवींद्र कदम, महेश पगार, राहुल पाटकर, प्रकाश शिंदे, तुषार निंबेकर यांनी पुढाकार घेत रस्त्यावर सिमेंटचे खांब टाकून हा रस्ता बंद केला आहे.

या ठिकाणचा रस्ता व पुलाचे काम तसेच जमीन हस्तांतर असा तब्बल ३०० कोटी रुपयांचा कामाचा प्रकल्प आहे. या ठिकाणी नागरिकांची मागणी लक्षात घेता नगरसेवक डी. जी. सूर्यवंशी यांच्या पाठपुराव्याने महापौर, महापालिका आयुक्त व अधिकारी यांचे पाहणी दौरे झाले. मात्र, काम मार्गी न लावल्याने दौरे केवळ देखावा करण्यासाठी झाल्याचा आरोप माजी नगरसेवक सूर्यवंशी यांनी केला आहे.

"हा रस्ता आणि पूल अत्यंत धोकादायक स्थितीत आले आहेत. अजून पावसाचा जोर वाढला आणि पाणी वाढले तर येथे कधीही मोठा अपघात होऊ शकतो अथवा वाहनदेखील वाहून जाऊ शकते. संबंधितांनी यात तातडीने लक्ष घालणे गरजेचे आहे." -महेश पगार, स्थानिक नागरिक

"मी या कामासंदर्भात १५ वर्षांपासून मनपाकडे पाठपुरावा करतो आहे, मात्र प्रशासन लक्ष देत नाही. अनेकदा अधिकारी आणि पदाधिकाऱ्यांचे दौरे झाले मात्र, प्रश्न मार्गी लागला नाही. या ठिकाणी दुर्घटना घडल्यास शिवसेनास्टाइल आंदोलन करू." -डी. जी. सूर्यवंशी, माजी नगरसेवक