Nashik Fire Accident: गॅलरीत रॉकेट पडल्याने आग; भाऊबीजेला आलेल्या बहिणीचे कपडे व लॅपटॉप जळाले

Nashik Fire Accident : भाऊबीजेच्या दिवशी खुटवडनगरला रात्री घराच्या गॅलरीत रॉकेट पडल्याने लागलेल्या आगीत लाखो रुपयांचे नुकसान झाले. यात भाऊबीजेला आलेल्या बहिणीचे कपडे लॅपटॉप तसेच दिवाळी सणाचे नवीन कपडे व घरागुती साहित्य जळून खाक झाले. (Fire due to rocket landing in gallery nashik fire accident)

खुटवडनगर पोलीस चौकी शेजारील सुरेश बापू प्लाझा इमारतीतील शैलेश सुंदरम हे सात नंबर या फ्लॅट मध्ये राहतात. त्यांच्याकडे दिपावली सणापासून त्यांच्या बहिणीसह कुटुंब परिवार आले होते.

भाऊबीजेची ओवाळणी करून सुंदरम व पाहुणे बाहेर फिरायला गेले होते. या वेळी रात्री १० वाजेच्या सुमारास बाहेरून एक फटाक्याचे राॅकेट गॅलेरीत आत आले. यात गॅलरीत ठेवण्यात आलेले बहिणीचे नवीन साड्या दोन लॅपटॉप तसेच दिवाळीतील नवीन कपडे तसेच सोपा पलंग व गाद्या जळून खाक झाले.

आग लागल्यानंतर घटनेची माहिती नागरिकांनी सातपूर अग्निशामन दलाला दिली. अग्निशामक दलाचे कर्मचारी पी.बी परदेशी, एस .आर .जाधव, ए .पी .मोरे, उन्हाळे व सहकर्मचारी घटनास्थळी दाखल झाले.

एक तासाच्या अथक परिश्रमानंतर आग आटोक्यात आणली. तर इमारती मधील नागरिकांनी घटनेची माहिती सुंदरम यांना दिली. तसेच इमारतीतील नागरिकांनी दरवाजा तोडून घरात प्रवेश केला व घरातील वस्तु बाहेर काढल्याने होणारे नुकसान वाचविले.