Nashik Ganeshotsav 2023: ओम शिवाय नमस्तुभ्यंचा जयघोष! मानाच्या गणपती मंडळांची मिरवणूक यंदा खास

: गणेशोत्सवात अनंत चतुर्थीला बाप्पाला मोठ्या भक्तिभावात निरोप दिला जाणार आहे. सार्वजनिक गणेश मंडळांकडून विसर्जनाची तयारी पूर्णत्वाकडे आली आहे.

यंदा सार्वजनिक मंडळांनी शिवलिंग असलेल्या देखाव्यांवर भर दिला असून, बम बम बोले, ओम शिवाय नमस्तुभ्यं, गणपती बाप्पा मोरयाचाच जयघोष असणार आहे. (Ganeshotsav 2023 procession of Manacha Ganpati mandals special this year nashik)

गणेशोत्सवाला मंगळवारी (ता. १९) मोठ्या थाटात सुरवात झाली. आता गणेशोत्सवाला अवघे दोन दिवस शिल्लक असून, गुरुवारी (ता. २८) अनंत चतुर्थीला बाप्पाला निरोप देण्यात येणार आहे.

सार्वजनिक गणेशोत्सव मंडळांनी यंदा विविध सामाजिक, राजकीय, शैक्षणिक, धार्मिक आदी विषयांवर देखावे सादर केले आहे. देखावे पाहण्यासाठी नाशिककरांचा उदंड प्रतिसाद मिळत आहे.

आता गणेशोत्सवातील विसर्जन मिरवणुकीत सार्वजनिक मंडळांचे देखावे विशेष आकर्षणाचा केंद्रबिंदू ठरणार आहे. महिलांचे पथक, पारंपरिक संबळ वाद्य, ढोल-पथकांचा मिरवणुकीत समावेश असणार आहे.

चांद्रयान-३ सह शिवलिंग आदींचा मिरवणूक देखाव्यात आकर्षण असेल. नाशिककरांना यंदा विसर्जन मिरवणुकीत वेगळेपण देण्याचा प्रयत्न सार्वजनिक मंडळांकडून केला जात आहे.

"केदारनाथ शिवलिंग, पंचवटीतील अघोरी पथक मिरवणुकीचे आकर्षण असणार आहे. महिलांचे लेझीम पथक, पारंपरिक संबळ वाद्य, ढोल-पथकाचा मिरवणुकीत समावेश असेल."

- रोहन पवार, उत्सव समितीप्रमुख, रविवार कारंजा

"नाशिकचा राजा मित्रमंडळाचे महिलांचे झांज पथक विशेष आकर्षण असणार आहे. पारंपरिक पद्धतीने ढोल पथकासह मिरवणुकीत चांद्रयान-३ ची थीम साकारण्यात आली आहे."

- समीर शेटे, संस्थापक अध्यक्ष, नाशिकचा राजा

"युवक मित्रमंडळाचे मिरवणुकीत फुलांचा देखावा सादर होणार आहे. महादेवाची सात फुटांची मूर्ती असेल. फुलांचे त्रिशूळ आणि ओम असेल. दीडशे वादकांचे ढोलपथक, डीजे, बॅन्जो असणार आहे."- किरण मोटकरी, युवक मित्रमंडळ, मुंबई नाका

"सरदार चौक मित्रमंडळाच्या विसर्जन मिरवणुकीत फुलांनी तयार केलेले शिवलिंग, पशुपतिनाथ मंदिरातील शिवलिंगाची प्रतिकृती, नंदी असणार आहे. ढोल-पथकाचाही समावेश असणार आहे."- योगेश गवळी, सरदार चौक मित्रमंडळ