Nashik Success Story: जिद्द चिकाटीच्या जोरावर नांदगावच्या गौरवची पोलिस उपनिरीक्षकपदाला गवसणी

Success Story: जिद्द, मेहनत, चिकाटी असेल तर यश निश्‍चित मिळते. नांदगाव शहरातील हमालवाडा भागातील दूरसंचार विभागातील कामगाराचा मुलगा असलेल्या गौरव कदमची पोलिस उपनिरीक्षकपदी निवड झाली आहे.

जिद्द, मेहनतीने मिळालेल्या या त्याच्या यशाचे सर्वत्र कौतुक होत आहे. (Gaurav Kadam was selected as Sub Inspector of Police nashik news)

पोलिस उपनिरीक्षक भरतीचा निकाल गुरूवारी (ता.२८) जाहीर झाला. त्यात गौरवने यश मिळाल्याचे समजाताच परिसरात आनंदोत्सव साजरा करण्यात आला. कुटुंबात पहिलाच पोलिस अधिकारी होण्याचा मान त्याला मिळाला आहे. गौरवचे प्राथमिक शिक्षण नगरपालिका शाळेत तर माध्यमिक शिक्षण येथील व्ही.जे स्कूलमध्ये झाले.

महाविद्यालयीन शिक्षण नांदगावच्या कला वाणिज्य विज्ञान महाविद्यालयात पूर्ण केले. पदवीसाठी नाशिक येथे प्रवेश घेतला. महाविद्यालयीन शिक्षण घेत विज्ञान विषयाची पदवी मिळविला. बाहेर काम करत त्याने कोणताही क्‍लास न लावता दिवसाला पाच ते सहा तास रविवारी संपूर्ण दिवस मुद्देसूद अभ्यासावर लक्ष केंद्रित करून यशाला गवसणी घातली.

त्याचे यश पाहून आई-वडिलांच्या डोळ्यांत आनंदाश्रू आले. नांदगांव येथील दूरसंचार विभागात अल्पमजुरीवर काम करणाऱ्या सुरेश गणपत कदम यांचे ते पुत्र आहेत. गरीब कुटुंबातील तरुण पोलिस उपनिरीक्षक झाल्याने सर्वत्र त्याचे कौतुक होत आहे. गौरवचा हमालवाडा येथील रहिवासी व मल्हारवाडी येथे श्रीराम जनसेवा मोफत वाचनालयात अध्यक्ष रवी सोनवणे यांनी नागरी सत्कार केला.

"आई-वडिलांनी घेतलेल्या कष्टाची जाणीव ठेऊन अधिकारी होण्याचे स्वप्न मी पाहिले होते. ते सत्यात उतरवण्यासाठी मी प्रयत्न केले. आज त्यांच्या कष्टाचे चीज झाले. मोठा भाऊ व नातेवाईक व मित्रमंडळींनी वेळोवेळी मार्गदर्शन केले. जिद्द, मेहनत आणि चिकाटी असेल तर अशक्य काहीच नाही." - गौरव कदम, नूतन पोलिस उपनिरीक्षक