Dada Bhuse News: पालकमंत्री भुसे यांची ‘सुपर ५०’ उपक्रमास अचानक भेट

Dada Bhuse News : पालकमंत्री दादा भुसे यांच्या संकल्पनेतून जिल्हा परिषदेच्या अंतर्गत साकारण्यात आलेल्या ‘सुपर ५०’ या उपक्रमास गतवर्षी सुरवात झाली.

या उपक्रमाचे हे दुसरे वर्ष असून, या कोर्सला शुक्रवारी (ता. ६) पालकमंत्री दादा भुसे यांनी अचानक भेट दिली. (Guardian Minister Bhuse surprise visit to Super 50 initiative nashik news)

भुसे यांनी संबंधित परिस्थितीचा आढावा घेत विद्यार्थ्यांशी संवाद साधत अभ्यासाबाबत माहिती जाणून घेतली. पालकमंत्री भुसे विद्यार्थ्यांशी संवाद साधताना म्हणाले, की जगाशी स्पर्धा करायची असल्यास विद्यार्थ्यांनी कष्ट घेणे गरजेचे आहे. काही अडचणी असल्यास कधीही मला कॉल करा, असे आवाहनही त्यांनी केले.

येणाऱ्या काळात विद्यार्थ्यांची संख्या वाढविली जाईल. आपल्याद्वारे गावातील, शेजारील आणि भावंडांनाही प्रेरणा मिळेल, अशा पद्धतीने शिक्षण घेऊन स्वतःचा विकास साधावा, असे आवाहनही त्यांनी या वेळी केले.

ग्रामीण भागातील या विद्यार्थ्यांना निवासी प्रशिक्षण देत जेईई, सीईटी, नीट या परीक्षांची तयारी करून घेतली जात आहे. जिल्ह्यातील मागासवर्गीय विद्यार्थ्यांसाठी ही योजना सुरू करण्यात आली आहे. पहिल्या फेरीत साडेतीन हजार विद्यार्थ्यांनी प्रवेश परीक्षा दिली होती. त्यातील ५० विद्यार्थ्यांची निवड करण्यात आली आहे.

या कोर्स अंतर्गत विद्यार्थ्यांना वर्ग, राहण्याची व्यवस्था तसेच आयआयटी, जेईईसाठी लागणारे संपूर्ण शिक्षण याठिकाणी एका छताखाली मिळत आहे. आडगावनजीक असलेल्या उपाध्ये महाविद्यालयात सर्व विद्यार्थ्यांचे वर्ग सुरू झाले आहेत. मुख्य कार्यकारी अधिकारी आशिमा मित्तल यांच्या देखरेखीखाली हा उपक्रम सुरू आहे.