Gurumauli Annasaheb More : नवनाथांच्या कृपेने जीवनसृष्टीचा शुभाशीर्वाद : गुरुमाउली

Gurumauli Annasaheb More : नवनाथांच्या हवनात्मक सर्वोच्च सेवेमुळे देशभरात सुवृष्टी होऊन अखिल जीवसृष्टीला शुभाशीर्वाद मिळतील, असा विश्‍वास अखिल भारतीय श्री स्वामी सेवामार्गाचे प्रमुख गुरुमाउली श्री आण्णासाहेब मोरे यांनी व्यक्त केला.

श्री स्वामी सेवामार्गातर्फे त्र्यंबकेश्वर येथील श्री गुरुपीठात तीनदिवसीय सामुदायिक हवनात्मक नवनाथ पारायण आणि श्रीदत्त नवनाथ पूजन सोहळा सुरू झाला आहे. (Gurumauli Annasaheb More guidance nashik news)

शनिवारी (ता. ९) साप्ताहिक सत्संग समारोहात परमपूज्य गुरुमाउलींचे अमृततुल्य हितगूज झाले. या वेळी सेवेकऱ्यांना मार्गदर्शन करताना गुरुमाउली म्हणाले, की यापूर्वी नवनाथांनी ब्रह्मगिरीवर जीवनसृष्टीच्या उद्धारासाठी आध्यात्मिक सेवा केली होती आणि त्यांच्या सेवेमुळे जनतेचेही कल्याण झाले होते.

आता त्याच सर्वशक्तिमान आणि देवांनाही अजिंक्य असलेल्या नवनाथांची आपण राष्ट्रकल्याण आणि जीवनसृष्टीसाठी हवनात्मक सेवा करीत आहोत. या सेवेमुळे नवनाथांची अवश्य कृपा होईल, असे गुरुमाउलींनी नमूद केले.

गुरुमाउली म्हणाले, की निसर्ग कोण्याचा ताब्यात नाही. मात्र, खऱ्या भक्तांच्या हाकेला त्याला धावून यावेच लागते. त्यापुढे देशभर सृवृष्टीला श्रीकृष्ण जन्माष्टमीपासून सुरवात झाली आहे, याकडे त्यांनी सेवेकऱ्यांचे लक्ष वेधले. यापूर्वीही सेवामार्गातर्फे राष्ट्र अन्‌ मानव कल्याणासाठी द्वारका, नैमिषारण्य आदी ठिकाणी आध्यत्मिक सेवा घेण्यात आली.

हेही वाचा : Credit Card फसवणूक....काय घ्याल काळजी?

कारण राष्ट्राचे संरक्षण आणि अखिल जीवसृष्टीचे कल्याण हेच सेवामार्गाचे प्रमुख उद्दिष्ट आहे. त्यासाठीच सामाजिक बांधिलकीच्या भूमिकेतून ग्राम व नागरी विकास अभियान राबविले जाते, असे त्यांनी स्पष्ट केले.

उपस्थित मुंबईकर सेवकऱ्यांचे कौतुक करताना मुंबईकर प्रसंगानुसार वेळेचे भान ठेवून सामुदायिक सहजीवनाचा आनंद घेतात. या आनंदातूनच सकारात्मक ऊर्जा निर्माण होत असते, असे ते म्हणाले.

आपल्यातील गुण-दोष नाहीसे करण्यासाठी दररोज रात्री झोपताना श्री स्वामी महाराजांना विनंती करा, असे सांगतानाच सकारात्मक ऊर्जा टिकवून ठेवण्यासाठी काय करावे व काय टाळावे, याची माहिती गुरुमाउलींनी दिली. मूल्यसंस्कार, शेती, समुपदेशन, विवाह, प्रशासकीय, पर्यावरण, कायदेशीर सल्लागार या विभागांवरही त्यांनी मार्गदर्शन केले. या वेळी गुरुमाउली चंद्रकांतदादा मोरे, नितीनभाऊ मोरे हेही उपस्थित होते.