Nashik Crime News : घोटी शिवारात 63 लाखांचा गुटखा जप्त

Nashik Crime News : शिवारात पोलिस अधीक्षकांच्या विशेष पथकाने प्रतिबंधक असलेला गुटखा, वाहनासह ६३ लाख २४ हजार दोनशे रुपयांचा मुद्देमाल जप्त केला.

याप्रकरणी चालक, मालक व ट्रान्सपोर्ट मालकाविरुद्ध गुन्हा दाखल झाला आहे. (Gutkha worth 63 lakh seized in ghoti Shivar nashik crime news)

छत्तीसगड येथून आयशर (सीजी ०४, पीसी ६८९५)मधून समृद्धी महामार्ग ते घोटी-मुंबई-नाशिक महामार्गवरून प्रतिबंधित गुटखा जाणार असल्याची माहिती पोलिस अधीक्षक शाहजी उमाप यांना मिळाली होती. त्यावरून त्यांच्या विशेष पथकाने संबंधित वाहनाचा पाठलाग केला.

नाष्टा व चहा पाण्यासाठी घोटी टोल नाक्यावर चालक मंगल श्रीनिवास (वय २३, रा. बंगला नंबर १४, घर नंबर ३१४, सिवनी, जहाँगीर चांपा, छत्तीसगड) याने आयशर थांबविला. पोलिसांनी चालकास पकडले.

वाहन व त्यातील मालाची चौकशी केली असता, पोलिसांनी बाहेर बांधकाम साहित्य व आत सुगंधित प्रतिबंधक गुटख्याच्या ६० मोठ्या गोण्या आढळून आल्या.

रायपूर (छत्तीसगड) येथील राजेंद्र कॉम्प्लेक्समधील बन्सल ट्रेडर्स या ठिकाणाहून माल मुंबईकडे घेऊन जात असल्याचे चालकाने सांगितले. त्यावरून श्रीकृष्ण ट्रेडर्स हिमांशू चौक, शॉप नंबर १४ (भिवंडी), भूपेंद्र शाहू (डोंगरगाव, छत्तीसगड) व नायक ट्रान्सपोर्टच्या मालकाविरोधात गुन्हा दाखल झाला आहे. सहाय्यक पोलिस निरीक्षक संदेश पवार तपास करीत आहेत.