Nashik News: HALला मिळाले 70 ट्रेनर विमानांचे काम

नाशिक : ओझर येथील हिंदुस्तान एरोनॉटिक्स लिमिटेड (एचएएल) कंपनीला हवाई दलातील नवोदित वैमानिकांना अत्याधुनिक प्रशिक्षण देण्याची क्षमता असलेली एचटीटी-४० जातीची विशेष ट्रेनर विमाने तयार करण्याचे काम मिळाले आहे. केंद्र शासनाने यासाठी सहा हजार आठशे कोटी रुपयांच्या निधीला मंजुरी दिली आहे.

केंद्राच्या या निर्णयामुळे एचएएल कारखान्यातील तीन हजार अधिकारी, कर्मचाऱ्यांना काम मिळणार असल्याची माहिती खासदार हेमंत गोडसे यांनी दिली. खासदार गोडसे यांच्या पाठपुराव्यामुळे कामगारांत उत्साहाचे वातावरण आहे.

विमाने बनविणारी एचएएल ही केंद्र शासनाची मोठी कंपनी असून, ओझर एचएएलमध्ये आजपर्यंत अनेक जातींच्या विमानांची निर्मिती झाली आहे. येथील कारखान्यात सुमारे तीन हजार अधिकारी, कर्मचारी कार्यरत आहेत.

विविध जातींची यशस्वी विमाने तयार करण्यात ‘एचएएल’ प्रशासनाचा मोठा हातखंडा आहे. परंतु काही वर्षांपासून ‘एचएएल’कडे कामाचा ओघ काहीसा कमी आहे. विमाने उत्पादनाचे वाढीव काम ‘एचएएल’ला मिळावे, यासाठी खासदार गोडसे यांच्या नेतृत्वाखाली कामगार संघटनेचे अध्यक्ष अनिल मंडलिक, सचिव संजय कुटे, गिरीश पाटील, प्रशांत आहेर, नितीन पाटील आदींनी दिल्ली येथे संरक्षण विभागाचे सचिव अजयकुमार यांची भेट घेतली होती.

नाशिकला ६० विमानांचे उत्पादन

खासदार गोडसे यांच्या पाठपुराव्याला यश आले असून, हवाई दलात नव्याने भरती होणाऱ्या वैमानिकांना अत्याधुनिक प्रशिक्षण देण्याची क्षमता असलेली एचटीटी-४० जातीची विशेष ट्रेनर विमाने तयार करण्याचे काम ‘एचएएल’ला देण्याचा निर्णय सरंक्षण विभागाने घेतला आहे.

त्यातील दहा विमानांची निर्मिती बेंगळुरू येथील एचएएलमध्ये, तर उर्वरित ६० विमानांची निर्मिती ओझर एलएएलमध्ये करण्यात येणार आहे. हवाई दलात दाखल झालेल्या वैमानिकांना एचटीटी- ४० जातीच्या या विशेष ट्रेनर विमानांद्वारे अत्याधुनिक प्रशिक्षण देण्यात येणार आहे.

''एचटीटी-४० जातीच्या विमानांचा वेग ताशी ४०० किलोमीटर असेल. हे विमान एकाच वेळी तीन तास हवेत राहू शकणार असून, ते पूर्णतः भारतीय बनावटीचे आहे. एचटीटी- ४० जातीची विमाने तयार करण्याच्या कामाला येत्या काही दिवसांत प्रत्यक्ष प्रारंभ होणार आहे.'' -हेमंत गोडसे, खासदार, नाशिक