स्मशानभूमीत उदरनिर्वाह करणाऱ्या बाबांना मदतीचा ओघ सुरू

सिडको (जि.नाशिक) : जिवंतपणीच तीन मुलांनी जन्मदात्या बापाला उंटवाडी स्मशानभूमीत सोडून दिल्याचे सचित्र वृत्त ‘सकाळ’ने प्रसिद्ध केल्यानंतर समाजातील विविध घटकांमधून भावनात्मक व काहीशा संतप्त प्रतिक्रिया उमटल्या. ८१ वर्षीय बाबांना हवी ती मदत करण्याची तयारी सर्वच क्षेत्रांतील मान्यवरांनी दर्शविली. मंगळवारी ‘सकाळ’च्या बातमीदाराकडे यासंदर्भात विचारणा झाली. यावरून माणुसकी अजूनही शिल्लक आहे, याचा प्रत्यय आला. एका प्रकारे ही सकारात्मक बाबच म्हणावी लागेल. (help-continue-to-Baba-lives-in-cemetery-nashik-marathi-news)

या बाबांवर ही परिस्थिती आणणाऱ्या मुलांनी आपणही कुणाचे तरी बाबा आहोत, याचा विचार करायला हवा. आपण जसे वागलो तशीच आपली मुले आपल्याशी वागल्यास काय वाटेल, हे त्यांनी लक्षात घ्यावे. ‘करावे तसे भरावे’ ही म्हण त्यांनी लक्षात ठेवावी. बाबांची ही परिस्थिती खूप दुःखदायक आहे. त्यांना आम्ही सर्वतोपरी मदत करण्यास तयार आहोत. -अमित कुलकर्णी, अध्यक्ष, निसर्गसेवक युवा मंच महाराष्ट्र

बाबांची करुण कहाणी ‘सकाळ’मध्ये वाचली. स्मशानभूमीत जाऊन बाबांची भेट घेतली. प्रथम त्यांची ॲन्टिजेन टेस्ट केली. त्यांची दाढी व कटिंग करून त्यांना नवीन कपडे परिधान केले. त्यांना भोजनही दिले. जिल्हा रुग्णालयात त्यांच्या आरोग्याची तपासणी करून सलाइन लावली. बाबांच्या चेहऱ्यावरील ओसंडून वाहत असलेला आनंद बघून मनाला समाधान वाटले. यापुढेही बाबांना असेच सहकार्य करणार आहे. -सुमीत शर्मा, सहसचिव, आप

बाबांच्या व्यथेला वाचा फोडून दैनिक ‘सकाळ’ने सामाजिक बांधिलकी जोपासली आहे. एक सामाजिक कार्यकर्ती म्हणून मी त्यांना वृद्धाश्रमात व्यवस्था करून देण्याचे ठरविले आहे. लवकरच बाबा पूर्वीसारखेच आनंदी जीवन जगतील, अशी परिस्थिती निर्माण करू, असे मी सर्वांना आश्वस्त करू इच्छिते. -सायली पालखेडकर, अध्यक्षा, सेवतीर्थ सेवाभावी संस्था