Nashik Water Shortage: इंदिरानगरमध्ये कृत्रिम पाणीटंचाईने नागरिक हैराण

Nashik Water Shortage : ऐन पावसाळ्यात इंदिरानगरमध्ये कृत्रिम पाणीटंचाईने नागरिक हैराण झाले आहे. कुठे मातीमिश्रित पाणी, तर कुठे अपुऱ्या पाणीपुरवठ्यामुळे नागरिकांना खासगी टँकरद्वारे आपली तहान भागवावी लागत आहे.

संबंधित अधिकारी आणि कर्मचाऱ्यांकडे तक्रार केली तर तेदेखील मनावर घेत नाहीत, अशी स्थिती निर्माण झाली आहे. (Indiranagar citizens worried about artificial water shortage nashik news)

मागील आठवड्यात विनयनगर परिसरातील श्री सप्तशृंगी देवी मंदिर परिसर, श्री कपालेश्वर अपार्टमेंट आदी परिसरात पाइपलाइनमधून गटारमिश्रीत पाणी येत असल्याने नागरिक त्रस्त आहेत.

या भागातील सामाजिक कार्यकर्ते प्रवीण जाधव यांनी तक्रार करून फोन केले, पाठपुरावा केला. मात्र, पाणीपुरवठा विभाग ड्रेनेज विभागाकडे बोट दाखवतो. समस्या मात्र जैसे थे, अशी स्थिती आहे.

अखेर जाधव यांनी स्वतः ड्रेनेज साफ करून घेतले. मात्र अजूनही समस्या पूर्णतः सुटलेली नाही. सध्या येथे काम सुरू असून मनपातर्फे येथे टँकर पाठवावा लागत आहे. कलानगर चौकात कमी दाबाने होणाऱ्या पाणीपुरवठ्यामुळे नागरिक वैतागले आहेत.

हेही वाचा : Credit Card फसवणूक....काय घ्याल काळजी?

या भागात असलेल्या श्री जी टॉवर सोसायटीत १५० सदनिका आहेत. मात्र, करंगळीएवढी धार पाण्याला असल्याने अवघे हजार दोन हजार लिटर पाणी या सोसायटीच्या टाकीमध्ये जमा होते. त्यामुळे दररोज खासगी टँकरद्वारे येथील रहिवाशांना तहान भागवावी लागत आहे.

गेल्या चार- पाच दिवसांपासून हीच परिस्थिती असल्याचे या भागातील नागरिक सांगतात. विशेष म्हणजे या भागातूनदेखील संबंधितांना फोन केले तर ते फोनच उचलत नाहीत, अशी तक्रार सामाजिक कार्यकर्ते ह्णषीकेश वर्मा यांनी केली आहे.