Kalaram Mandir: पंतप्रधान मोदी आज करणार काळाराम मंदिरात आरती; असा आहे मंदिराचा इतिहास

Kalaram Mandir: नाशिक मध्ये आज होणाऱ्या राष्ट्रीय युवा महोत्सवाच्या उद्घाटनासाठी पंतप्रधान नरेंद्र मोदी नाशिकला येणार आहेत.

नाशिकच्या या दौऱ्यात पंतप्रधान मोदी  श्री काळाराम मंदिरात जाऊन दर्शन आणि पूजा करून महाआरती करणार आहे. मात्र काळा राम मंदीराच इतिहास तुम्हाला माहीत आहे का?

तर प्रभू रामचंद्र, लक्ष्मण व सीतामाईने संपूर्ण चौदा वर्षांच्या वनवासातील कालखंडातील मोठा काळ सद्याच्या राममंदिर परिसरात म्हणजे पंचवटीत व्यतित केल्याची आख्यायिका आहे. पूर्वी याठिकाणी श्रीरामाचे लाकडी मंदिर होते. माधवराव पेशवे यांच्या मातोश्री गोपिकाबाई पेशवे यांचे त्याकाळी पुण्याहून नाशिकला येणे जाणे होते.

पंचवटीतील ज्याठिकाणी प्रभू रामचंद्रांचे वास्तव्य होते, त्याचठिकाणी श्रीरामाचे भव्य मंदिर बांधण्याचा ध्यास गोपिकाबाईंनी घेतला. त्यांनी ही जबाबदारी माधवरावांचे मामा व ओढा येथील पेशव्यांचे संस्थानिक सरदार रंगराव ओढेकर यांच्याकडे सोपाविली. त्यानंतर हे भव्य मंदिर आकारास आले. त्यासाठी सहा वर्षांचा काळ लागला. मंदिरासाठी लागणार दगड रामशेज किल्याजवळून आणण्यात आला.

मंदिराची लांबी ८४ मीटर तर रुंदी ३२ मीटर आहे. मंदिराला मुख्य चार दरवाजे असून मंदिराच्या आवारात आकर्षक पद्धतीने बांधलेल्या चौ-यांशी ओव-या आहेत. मंदिरावर जमिनीपासून ६९ फूट उंचावर सोन्याचा कळस आहे. नागर शैलीतील या मंदिराच्या बांधकामाला १७८२ ला प्रत्यक्ष प्रारंभ झाला. सहा वर्षांत हे बांधकाम पूर्ण झाले.

मंदिरात प्रभू रामचंद्र, सीतामाई व लक्ष्मणाच्या काळ्या पाषाणातील दोन फूट उंचीच्या वालुकामय मूर्तींची स्थापना करण्यात आली. यावरूनच या मंदिराचे नाव श्री काळाराम मंदिर असे पडले.