Chhagan Bhujbal: छगन भुजबळांनी मंत्रिपदाचा राजीनामा द्यावा : गायकर

Chhagan Bhujbal : मराठा आरक्षणाला राज्याचे अन्न व नागरी पुरवठामंत्री छगन भुजबळ यांचाच खरा विरोध आहे. त्यांच्या सभोवताली घुटमळणाऱ्या मराठा बांधवांनी शहाणे व्हावे, अशी समाजाची भावना आहे.

भुजबळ यांनी कुठल्याच संविधानिक पदावर राहण्याचा अधिकार नाही. (Karan Gaikar statement Chhagan Bhujbal should resign as minister maratha reservation nashik news)

त्यांनी स्वतःहून मंत्रिपदाचा राजीनामा द्यावा, राजीनामा देण्याची त्यांची इच्छा नसेल तर उपमुख्यमंत्री अजित पवार यांनी त्यांचा राजीनामा घेण्याची मागणी छावा क्रांतिवीर सेनेचे संस्थापक अध्यक्ष व मराठा क्रांती मोर्चाचे राज्य समन्वयक करण गायकर यांनी केली.

मराठा समाजाच्या पाठिंब्यामळे भुजबळ यांचा राजकीय प्रवास झाला आहे. शिवसेनेशी गद्दारी केल्यावर मुंबईच्या स्वाभिमानी मराठा समाजाने त्यांचा पराभव केला. नाशिक जिल्ह्यातील मराठा समाजाने त्यांना राजकीय जीवनात पुन्हा उभे केले. पुतणे समीर यांनाही लोकसभेत पाठविले. मराठा समाज कुणाच्याही ताटातील भाकरी ओरबाडून घेत नाही.

उलट काही काळ अर्धपोटी राहून आपल्या इतर भावंडांना आपल्या घासातील घास देतो, ही संस्कृती आहे. याच संस्कृतीशी प्रामाणिक राहून मराठा समाजाने आजवर आपल्या हक्काचे आपल्या ताटातील आरक्षण आपल्या ओबीसी भावंडांना दिले. आज काही निवडक राजकीय नेते कार्यकर्त्यांना मराठा समाजाविरुद्ध भडकावत आहेत.

त्यांना केवळ त्यांची सत्तापदे टिकवायची आहेत, म्हणून मराठा व ओबीसी या दोन समाजांत दरी निर्माण करण्याचा प्रयत्न भुजबळ करीत आहेत. त्यांचे सध्याचे वक्तव्य आणि भूमिका या शपथवचनाचा भंग करणारी आहे. त्यांना मंत्रिपदावर राहण्याचा अधिकार नाही.